ShQO turǵyndarynyń jylý aqysyna tólegen 297 mln teńgesi qaıtarylady
ÓSKEMEN. KAZINFORM — Ótken jylytý maýsymynyń qorytyndysy boıynsha Shyǵys Qazaqstan oblysyndaǵy jylýmen jabdyqtaý qyzmetterin tutynýshylarǵa 297 mln teńge qaıtarylady.
2025-2026 jyldardaǵy jylytý maýsymynyń qorytyndysy boıynsha qaıta esepteý kóppáterli turǵyn úılerde jylý energııasyn esepteýdiń jalpyúılik aspaptary ornatylmaǵan turǵyndarǵa júrgiziledi. Bul týraly ShQO Óńirlik kommýnıkatsııalar qyzmetinde ótken brıfıngte QR Ulttyq ekonomıka mınıstrligi Tabıǵı monopolııalardy retteý komıteti ShQO boıynsha departamentiniń basshysy Qýat Mustafın málim etti.
Turǵyndar jylýǵa 297 mln teńge artyq tólegen. Monopolııa sýbektileri qaıtarylatyn somany dástúrli túrde turǵyndardyń túbirtekterinde aldaǵy tólemder esebinen avans retinde kórsetedi.
Departament basshysynyń aıtýynsha, kommýnaldyq qyzmet kórsetýshilerdiń jumysyna baqylaý turaqty túrde júrgiziledi. Bıylǵy birinshi jartyjyldyqta vedomstvo mamandary tarıfterdiń negizdiligine jan-jaqty monıtorıng júrgizip, kommýnaldyq kásiporyndardyń tarıftik smetalary men ınvestıtsııalyq mindettemelerin oryndaý barysyn teksergen.
— Tarıf qalyptastyrý protsesi halyq úshin barynsha ashyq ári túsinikti bolýy kerek. Osy maqsatta biz turaqty túrde qoǵamdyq tyńdaýlar ótkizip, azamattardy jeke qabyldaımyz, kommýnaldyq kásiporyndardyń nysandaryna baspasóz týrlaryn uıymdastyramyz, — dedi Qýat Mustafın.
Sonymen qatar óńirde 2029 jylǵa deıingi «Energetıkalyq jáne kommýnaldyq sektorlardy jańǵyrtý» ulttyq jobasy aıasynda tozyǵy jetken ınjenerlik jelilerdi jańartý jumystary jalǵasyp jatyr. Baǵdarlamanyń negizgi maqsaty — jylý jáne sý jelilerindegi apattylyqty barynsha azaıtyp, kórsetiletin qyzmetterdiń sapasyn arttyrý.
Brıfıng barysynda áleýmettik osal jáne az qamtylǵan otbasylarǵa kórsetiletin kómek týraly da aıtyldy. Eger kommýnaldyq qyzmetterge jumsalatyn shyǵyn otbasynyń jıyntyq tabysynyń belgilengen shekti deńgeıinen asyp ketse, aıyrmashylyq bıýdjet qarajaty esebinen óteledi.
Eske salsaq, osyǵan deıin Óskemende jylytý maýsymy 5 qazanda bastalatyndyǵy habarlanǵan.
