ShQO turǵyndarynyń jylý aqysyna tólegen 257 mln teńgesi qaıtarylady

ÓSKEMEN. KAZINFORM – Shyǵys Qazaqstan oblysy turǵyndarynyń ótken jylytý maýsymyndaǵy tólemderin qaıta esepteýden keıin 257 mln teńgeden astam qarajatty artyq tólegeni anyqtaldy.

Belgili bolǵandaı, daladaǵy naqty temperatýra men tarıfte eskerilgen eseptik temperatýra arasynda aıyrmashylyq bolǵan. Sondyqtan jylýmen qamtamasyz etýshi kompanııalar tutynýshylarǵa artyq tólegen aqshalaryn qaıtarýy tıis. Bul týraly ShQO boıynsha Tabıǵı monopolııalardy retteý departamentinen málim etti.

Qaıta esepteý tek ortalyqtandyrylǵan jylý júıesine qosylǵan, biraq úıinde jylý eseptegishi ornatylmaǵan abonentterge ǵana júrgiziledi.

- 229 mln teńgeden astam somany Óskemendegi «Shyǵys Jylý» AQ óz abonentterine qaıtarady. «Vostokenergo» JShS tutynýshylaryna shamamen 21,2 mln teńge qaıta eseptelmek. Ulan aýdanynda «Molodejnyı» KMK bolsa 3,4 mln teńgeden astam somany óteıdi. «L-TVK» JShS 1,6 mln teńge qaıtarady. Al Zaısan qalasynda qaıta esepteý somasy – 648 myń teńgege jýyq, Úlken Naryn aýylynda – 607 myń teńge shamasynda, Kúrshimde – 335 myń teńgeden asady. Barlyq soma qosylǵan qun salyǵymen birge eseptelgen, - delingen aqparatta.

Ótemaqy kelesi aıdaǵy túbirtekterde kórsetilip, tólem somasy azaıtylyp otyrady.

Eske salsaq, buǵan deıin Qostanaı oblysynyń turǵyndaryna jylýǵa jumsalǵan 106 mln teńge qaıtarylatyndyǵy habarlanǵan.