ShQO turǵyndaryna jylýǵa artyq tólengen 257 mln teńge qaıtaryldy

Bul týraly ShQO boıynsha tabıǵı monopolııalardy retteý departamentiniń basshysy Qýat Mustafın málim etti. 

Qaıta esepteý ınvestıtsııalyq baǵdarlamalar men tarıftik smetalardyń oryndalýyn tekserý nátıjesinde júrgizilgen. Sonyń barysynda birqatar kásiporynnyń óz mindettemelerin tolyq oryndamaǵany anyqtaldy.

Qaıtarylǵan qarajattyń basym bóligi «Shyǵys Jylý» AQ-ǵa tıesili (229 mln teńge). Sonymen qatar basqa uıymdar boıynsha da qaıta esepteý júrgizildi: «Vostokenergo» JShS - 21 mln teńge, «Molodejnyı» JShS - 3,4 mln teńge, «L-TVK» JShS - 1,6 mln teńge qaıtarýǵa mindetteldi. Taǵy shamamen 2 mln teńge Zaısan, Kúrshim jáne Úlken Naryn eldi mekenderiniń kommýnaldyq kásiporyndary arqyly qaıtarylmaq.

Sonymen qatar sońǵy bir jylda departament retteletin qyzmet kórsetýshilerden túsken 227 ótinimdi qarastyrǵan. Onyń 180-i maquldanyp, 47-si keri qaıtarylǵan nemese qabyldanbaǵan.

Baqylaý qorytyndysy boıynsha bes kompanııaǵa qatysty jalpy somasy 61 mln teńgeni quraıtyn ótemdik tarıfter engizildi.

- Tabıǵı monopolııa sýbektisi ınvestıtsııalyq mindettemelerin oryndamaǵan jaǵdaıda bul tarıfke tikeleı áser etedi. Osyndaı jaǵdaılarda halyqqa qarajatty qaıtarý tetigi qoldanylady, - dedi Qýat Mustafın.

Eske salsaq, osyǵan deıin Qyzylorda oblysynda jylý berý maýsymy aıaqtalǵany habarlanǵan.