ShQO turǵyndaryna tegin zańgerlik kómek kórsetildi
ÓSKEMEN. KAZINFORM – Shyǵys Qazaqstan oblysynda «Halyq zańgeri» respýblıkalyq aktsııasy ótti.
«Halyq zańgeri» respýblıkalyq aktsııasy búkil el aýmaǵynda ótkizildi. Shyǵys Qazaqstanda atalǵan aktsııa túgel qalalar men aýdan ortalyqtarynda qolǵa alyndy. Al Óskemen turǵyndaryna eki mekenjaı boıynsha tegin zańgerlik kómek kórsetildi. Onyń biri – S.Amanjolov atyndaǵy Shyǵys Qazaqstan ýnıversıtetiniń ákimshilik ǵımaraty.
Bul jerde zań aıasynda keńes alǵysy kelgen halyq qarasy az bolǵan joq. Árbir adamdy kireberisten qarsy alyp turǵan mamandar máselesin tyńdap, ary qaraı naqty kómek kórsete alatyn qyzmetkerge joldap otyrdy. Turǵyndar sot, quqyq qorǵaý, qadaǵalaý organdarynyń qyzmetkerleriniń, advokattar, sot oryndaýshylary, notarıýstar jáne oblys ákimdiginiń, basqarmalardyń, qala, aýdan ákimdikteri bólimderi ókilderiniń keńesin aldy.
«Aktsııany oblysta ShQO ákimdigi, oblystyq Ádilet jáne Sybaılas jemqorlyqqa qarsy is-qımyl agenttigi departamentteri uıymdastyryp otyr. Mundaǵy maqsat – turǵyndarǵa tegin zań kómegin kórsetý, halyqtyń zańgerlik saýattylyǵyn arttyrý. Azamattar ártúrli máselelermen keldi. Olar túrli memlekettik organdarǵa jete almaı júrgendikterin, búgin bir jerden tolyqqandy aqparat ala alǵanyn aıtady. Odan keıin basqa ýaqytta zańgerge barǵandar qomaqty aqsha tólep jatady. Al bul jerde barlyq kómek esh aqysyz kórsetildi. Sondyqtan jyl saıyn ótkiziletin osy aktsııanyń mańyzy zor», - deıdi Shyǵys Qazaqstan oblystyq Іshki saıasat basqarmasynyń basshysy Serik Jeńisov.
QR Sybaılas jemqorlyqqa qarsy is-qımyl agenttiginiń ShQO boıynsha departamenti basshysynyń birinshi orynbasary Talǵat Bashevtyń aıtýynsha, jemqorlyq faktilerine jol bermeýde jáne halyqtyń zań aıasyndaǵy bilimin arttyrýda «Halyq zańgeri» aktsııasynyń bereri mol.
«Bul aktsııa sybaılas jemqorlyqqa qarsy aqparattyq túsindirý sharalaryn júrgizýdiń jumys josparyna engizilgen. Árbir kelgen azamatqa qajetti aqparat berildi. Negizi kóp jaǵdaıda jemqorlyq faktileriniń tirkelýine – halyqtyń óz quqyǵyn durys bilmeýi sebep bolady. Sondyqtan osyndaı sharalardy jıi qolǵa alyp turǵan durys», - deıdi ol.
Berik esimdi azamat jer máselesine qatysty bilmegenin suraýǵa kelgen. Quzyrly basqarma ókilderi onyń ár suraǵyna tolyqqandy jaýap berdi. Al Asqar esimdi qala turǵyny shetelden satyp alǵan kóligin tirkeý merzimi týraly qajetti aqparatty ala aldy. Zańger men notarıýstyń kómegine júgingen azamattar da kóp boldy.
«Barlyǵy jospardaǵydaı ótti. Jurtshylyq ishinen zańger men notarıýs kómegin qajet etkender kóp boldy. Sol úshin de óńirdegi eń bilikti zańgerler, advokattar shaqyrylǵan edi. Jyl saıyn qolǵa alynyp kele jatqan aktsııanyń bıylǵy ereksheligi - tek Óskemende emes, oblystyń basqa da qalalary men aýdan ortalyqtarynda uıymdastyrylýy boldy», - deıdi ShQO Ádilet departamenti basshysynyń orynbasary Aıdyn Ámirhanov.
Aıta keteıik, el boıynsha 2016-2023 jyldar aralyǵynda «Halyq zańgeri» aktsııasyna 8000-nan astam úzdik sarapshylar men sheshim qabyldaıtyn memlekettik organdardyń ókilderi qatysty. Quqyqtyq kómekke júgingen 165 000-nan astam adam keńes aldy.
