ShQO turǵyndaryna Qurban aıt kezindegi qaýipsizdik talaptary eskertildi
ÓSKEMEN. KAZINFORM - Shyǵys Qazaqstan oblysynda turǵyndarǵa qurbandyq shalý jáne et ónimderin saqtaý kezinde qaýipsizdik talaptaryn saqtaý qajettigi eskertildi.
ShQO Sanıtarlyq-epıdemıologııalyq baqylaý departamentiniń habarlaýynsha, Qurban aıt kúnderi taǵamnan ýlaný men jiti ishek ınfektsııalarynyń týyndaý qaýpi artady.
- Sondyqtan sanıtarlyq-gıgıenalyq talaptardy qatań saqtaý mańyzdy. Óńir turǵyndaryna etti tek resmı ruqsat etilgen saýda oryndardan: bazarlardan, dúkenderden jáne arnaıy qasaphanalardan satyp alý usynylady. Satyp alý kezinde veterınarııalyq qujattardyń jáne veterınarııalyq qyzmet móriniń bolýyna nazar aýdarý qajet, - delingen aqparatta.
Mal soıý tártibine de erekshe kóńil bólý kerek. Mal tek arnaıy belgilengen oryndarda jáne qasaphanalarda soıylýy tıis. Turǵyn úılerdiń aýlalarynda, balalar alańdarynyń mańynda jáne sý aıdyndary janynda mal soıýǵa tyıym salynǵan.
- Sonymen qatar jeke gıgıena talaptaryn buzbaı, etti durys saqtaý qajet. Et ónimderin tıisti temperatýralyq rejımde saqtaý, taǵamnyń ystyqta uzaq ýaqyt turyp qalýyna jol bermeý jáne mindetti túrde tolyq termııalyq óńdeýden ótkizý qajet. Jappaı taǵamnan ýlaný jaǵdaılarynyń basym bóligi ettiń sapasyna emes, qarapaıym sanıtarlyq talaptardyń saqtalmaýyna baılanysty bolady. Atap aıtqanda, qoldyń kir bolýy, ortaq ydysty paıdalaný jáne ónimderdi durys saqtamaý qaýip týdyrady, - delingen habarlamada.
Tamaqtan ýlaný belgileri - júrek aıný, qusý, dene qyzýynyń kóterilýi nemese ish ótý baıqalǵan jaǵdaıda turǵyndar dereý medıtsınalyq kómekke júginýi qajet.
Eske salsaq, osyǵan deıin qurban shalý rásimin qashyqtan ótkizýge arnalǵan saıt iske qosylǵany habarlanǵan.
