ShQO turǵyndaryn aldap, 106 mln teńge paıda kórgen eki alaıaqtyń jazasy qatańdatyldy

ÓSKEMEN. KAZINFORM – Shyǵys Qazaqstan oblysynyń 24 turǵynyn aldap, 106 mln teńge paıda kórgen eki alaıaqtyń jazasy qatańdatyldy.

ShQO soty baspasóz qyzmetiniń málimetine súıensek, eki er adam óńir halqyna qońyraý shalyp, ózderin bank qyzmetkerleri retinde tanystyrǵan. Olarǵa bul qylmystyq shemany «Telegramm» arnasy arqyly sheteldik azamattar úıretken. 

«Halyqty aldap tapqan aqshany ekeýi Óskemen qalasynda ornalasqan 2-shi dárejeli bankterdiń bankomattary arqyly sheship, sol sheteldikterdiń shotyna aýdarǵan. Ózderine tek 10 paıyzyn qaldyryp otyrdy. Osylaısha, aıyptalýshylar 24 adamdy tuzaqqa túsirip, olardy 105 844 199 teńgege shyǵynǵa batyrǵan», - delingen aqparatta. 

Er adamdardyń biri esirtkige táýeldi bolǵandyqtan iri mólsherde psıhotroptyq zat satyp alǵany anyqtaldy. Sottyń birinshi satysynda sottalýshylarǵa 5 jylǵa bas bostandyǵynan aıyrý jazasy taǵaıyndalǵan bolatyn. Alaıda jábirlenýshiler bul sheshimmen kelispeı, jazany qatańdatý úshin apellıatsııalyq shaǵym túsirdi. 

«Apellıatsııalyq sot jasalǵan qylmystyń aýyrlyǵyn, zalaldyń ótelmeýin jáne áleýmettik osal sanattaǵy adamdardyń zardap shegýin eskerip taǵaıyndalǵan jazany ózgertti. Sot qaýlysy boıynsha aıyptalýshylardyń biri 7 jylǵa, ekinshisi 6 jylǵa bas bostandyǵynan aıyryldy. Úkim zańdy kúshine endi», - delingen habarlamada.

Eske salsaq, osyǵan deıin Óskemende júrgizýshi kýáligine emtıhan tapsyrǵandardan 40 mln teńge syıaqy alǵan HQO qyzmetkerleri sottalǵany habarlanǵan.