ShQO turǵyndary jylýǵa 354 mln teńge artyq tólegen
ÓSKEMEN. KAZINFORM – Shyǵys Qazaqstan oblysy turǵyndaryna jylý aqysyna tólegen 354 mln teńge qaıtarylady.
Tabıǵı monopolııalardy retteý komıteti Shyǵys Qazaqstan oblysy boıynsha departamenti jylýmen jabdyqtaý qyzmetin kórsetken kásiporyndarmen birlesip, ótken jylytý maýsymynyń qorytyndysy boıynsha syrtqy aýanyń naqty temperatýrasyn eskere otyryp, jylý qyzmetteriniń qunyn qaıta eseptedi. Sonyń nátıjesinde óńir turǵyndarynyń jylýǵa qansha teńge artyq tólegeni belgili boldy.
«2023-2024 jyldardaǵy jylytý kezeńinde halyqqa qaıtarylatyn qarajat somasy 354 460 648 teńgeni quraıdy. Onyń ishinde Rıdder qalalyq JEO – 50 401 399 tenge, «Óskemen jylý jelileri» AQ – 220 034 733 teńge, «Vostokenergo» JShS – 72 065 099 teńge, «Kúrshim» memlekettik kommýnaldyq kásiporny – 857 869 teńge, «L-TVK» JShS – 8 761 664 teńge, «Serebrıansk jáne Jańa Buqtyrma kentiniń jylý-sý ortalyǵy» MKK – 1 069 194 teńge, «Zaısan» ShJQ KMK – 1 270 689 teńge», - dep habarlady departamentten.
Aıta ketý kerek, endi barlyq tutynýshy kommýnaldyq jylý eseptegishterin paıdalanýǵa aýysatyndyqtan, tutynýshy tek naqty tutynylǵan jylý energııasynyń somasyn tóleıdi jáne sáıkesinshe qaıta esepteý qajet bolmaıdy.
