ShQO turǵyndary onkologııalyq dárilerdi ala almaı ábigerge tústi

ÓSKEMEN. KAZINFORM – Shyǵys Qazaqstan oblysynyń turǵyndary onkologııalyq dárilerdi ala almaı jatqanyn aıtyp, narazylyq bildirdi.

Óńir jurtshylyǵynyń bir aı boıy onkologııalyq dárilerge qoly jetpeı otyr.

- «Anastrozol» preparatyn ala almaı jatyrmyz. Sonyń saldarynan anamnyń densaýlyǵy nasharlap barady. Dárigerlerge aıttyq. Biraq olar dáriniń áli kelmegenin aıtyp jatyr. Aq halattylar emniń basqa túrin de usynbady. Sonda ne istemek kerek? Qashanǵa deıin tosamyz?! - dep Óskemen qalasy turǵyndarynyń biri narazylyǵyn bildirdi.

Bul máselege qatysty Shyǵys Qazaqstan oblysynyń onkologııalyq dıspanserinen jaýap berdi.

- Naýqastardy dári-dármekpen qandaı kólemde qamtamasyz etý qajettigi týraly málimet jyl sońynda «SK-Farmatsııa» biryńǵaı dıstrıbıýtoryna jiberilgen. Alaıda dári-dármektiń jetkizilýinde ýaqytsha kidiris týyndady. Bul tek bizde ǵana emes, túgel oblystarda bolyp jatqan másele, - dep habarlady dıspanser mamandary.

Dári naýqastarǵa ótken jyldyń jeltoqsan aıynda berilgen.

- «Anastrozol» preparatyn ishýdi ýaqytsha toqtatqan jaǵdaıda naýqastyń jaǵdaıy nasharlamaýy tıis. Qazirgi ýaqytta bul preparat biryńǵaı dıstrıbıýtordyń qoımalaryna jetkizildi. Kelesi aptada bizge jetedi dep josparlanyp otyr, - delingen habarlamada.

Eske salsaq, buǵan deıin ShQO aýyldaryna 100-ge jýyq dáriger jetispeıtindigi habarlanǵan.