ShQO turǵyndary kóligine VIP nómir alýǵa 63 mln teńge jumsady
ÓSKEMEN. KAZINFORM — Shyǵys Qazaqstan oblysynyń turǵyndary kólikterine VIP-nómir alýǵa bir jyl ishinde 63 mln teńge jumsaǵan.
QazaqstandaVIP nómirlerdi satý tájirıbesi 2014 jyly engizilgen.
Satýdan túsken qarjy el bıýdjetine túsedi.
«Azamattarǵa arnalǵan úkimet» memlekettik korporatsııasynyń ShQO fılıalynyń málimetinshe, óńirdegi avtokólik ıeleri 2023 jyly 217 sándi nómirdi 63 mln teńgege satyp alǵan.
«010, 020, 030, 040, 050, 060, 070, 077, 080, 090, 707 nómirleri eń jyldam satyldy. Ár nómirdiń baǵasy 57 AEK-ti (210 444 teńgeni) quraıdy. VIP-nómirler qataryndaǵy áripteri birdeı eń qymbat sandar 001, 002, 003, 004, 005, 006, 007, 008, 009, 777 sandary. Mundaı árbir nómir kólik ıesi úshin 285 AEK (1 052 220 teńge) turady», — delingen aqparatta.
Memlekettik nómir ıesi ony úshinshi tulǵaǵa bere almaıdy nemese sata almaıdy.
Avtokólik satylǵan jaǵdaıda ıesi ony jańa kólik satyp alǵanǵa deıin arnaıy baǵamen 6 aıǵa deıin saqtaı alady.
