ShQO turǵyndary aptap ystyqqa baılanysty dárigerlerge jıi júgine bastady
ÓSKEMEN. KAZINFORM - Shyǵys Qazaqstan oblysynda bıyl sońǵy jyldardaǵy eń ystyq jaz kelip otyr. Aýa temperatýrasynyń kúrt kóterilýine baılanysty kún ótýden zardap shegip, medıtsınalyq mekemege júginetinder sany da artqan.
ShQO Densaýlyq saqtaý basqarmasynyń málimetinshe, maýsym aıynda óńirde kún ótýge baılanysty 25 jaǵdaı tirkelgen. Bul ótken jyldyń sáıkes kezeńimen salystyrǵanda eki eseden kóp. Byltyr dál osy ýaqytta medıtsınalyq kómekke 12 adam júgingen bolatyn.
Dárigerlerdiń aıtýynsha, kún ótý - uzaq ýaqytqa sozylǵan aptap ystyqtyń eń qaýipti saldarynyń biri. Ásirese egde jastaǵy adamdar, júrek-qan tamyrlary jáne sozylmaly aýrýlary bar naýqastar men balalar qaýip tobyna jatady.
– Egde jastaǵy adamdar men sozylmaly aýrýlary bar azamattar kúnniń ystyǵyna osal keledi. Eger álsizdik, bas aınalý, júrek aıný, dene qyzýynyń kóterilýi sııaqty alǵashqy belgiler baıqalsa, dereý salqyn jerge baryp, suıyqtyqtyń ornyn toltyryp, jaǵdaıy nasharlap ketse ýaqyt ozdyrmaı medıtsınalyq kómekke júginý qajet, – delingen aqparatta.
Mamandar turǵyndarǵa kúnniń eń ystyq mezgili – saǵat 11:00-den 17:00-ge deıin ashyq kún astynda uzaq júrmeýge, ashyq tústi jeńil kıim men bas kıim kııýge, jetkilikti mólsherde sý ishýge keńes beredi.
Sınoptıkterdiń boljaýynsha, óńirde aldaǵy kúnderi de aptap ystyq saqtalady.
Eske salsaq, osyǵan deıin ShQO-daǵy 6 aýdanda qurǵaqshylyq qaýpi bar ekendigi jaıly jazǵanbyz.
