ShQO turǵyndary -50 gradýsqa deıingi aıazdy qalaı ótkerip jatyr
ÓSKEMEN. KAZINFORM — Shyǵys Qazaqstan oblysynda aýa raıy kúrt sýytyp ketti. Keı eldi mekenderde aýa temperatýrasy -56 gradýsqa deıin tómendegen.
Oblystaǵy eń sýyq jer
Marqakól aýdany ákimdiginiń málimetinshe, 18 qańtar kúni tańerteń Shanaǵatty aýylynda aýa temperatýrasy -56 gradýsqa deıin tómendegen. Bul eldi mekendegi eń sýyq tarıhı kórsetkish 1969 jyly tirkelip, -62 gradýsqa jetken edi.
Mundaı klımattyq jaǵdaı aýyldyń geografııalyq ornalasýyna da baılanysty. Shanaǵatty shaǵyn oıpatta oryn tepken. Qazirgi tańda osynda shamamen 60 adam turady. Azynaǵan aıazǵa qaramastan medıtsınalyq pýnkt, dúken óz jumysyn jalǵastyryp keledi.
Marqakól aýdanynyń ákimi Rústembek Kemeshevtiń aıtýynsha, jergilikti turǵyndardyń eti qatal qysqa ábden úırengen.
— Bul oblystaǵy eń alys ári sýyq eldi mekenderdiń biri. Mundaǵy turǵyndar osyndaı jaǵdaıda uzaq jyl boıy ómir súrip keledi, aıazben kúresýdi jaqsy meńgergen. Qazirgi tańda tótenshe jaǵdaılar tirkelgen joq, dese de ahýal turaqty baqylaýda, — dedi aýdan basshysy.
Osyndaı jaǵdaı Altaı aýdanynda da baıqalyp otyr. Parygıno aýylynda aýa temperatýrasy -53 gradýsqa deıin tómendegen. Aýdan ákimi Renat Kýrmambaev eldi mekenniń sýyqqa aldyn ala daıyndalǵanyn aıtty.
— Áleýmettik jáne kommýnaldyq nysandar turaqty jumys istep tur, apattyq ajyratýlar joq. Barlyq qyzmet qalypty rejımde jumys istep tur, jaǵdaı tolyq baqylaýda, — dedi ol.
Sınoptıkter boljamy men mamandardyń eskertýleri
«Qazgıdromet» RMK málimetinshe, túngi ýaqytta oblys aýmaǵynda aýa temperatýrasy -40 gradýsqa deıin tómendeýi múmkin. Keıbir aýdandarda tuman kútiledi. Óskemen qalasynda da osyǵan uqsas aýa raıy boljanyp otyr.
Osyǵan baılanysty turǵyndarǵa eldi mekenderden tys jerlerge shyǵýdy shekteý jáne qaýipsizdik sharalaryn qatań saqtaý usynylady.
Oblystyq TJD memlekettik órt baqylaý basqarmasynyń bastyǵy Nurjan Ómirjanovtyń aıtýynsha, mundaı kezde úıler men páterlerde elektr jylytqyshtar men peshterde júkteme artady. Sondyqtan olardyń jumysyna nazar aýdarý kerek.
— Peshti únemi qyzdyrmańyz, shamadan tys qyzyp ketpes úshin úzilis jasaý qajet. Balalarǵa pesh jaǵýdy senip tapsyrýǵa bolmaıdy. Jylytqyshty jelige qospas buryn sym men shtepseldi tekserý kerek. Onyń ústine zattardy keptirýge tyıym salynady, — deıdi ol.
Shyǵys Qazaqstan oblysynyń ákimdiginen turǵyndardyń páterleri salqyn bolyp qalmaıtynyn málim etti. Aımaqtaǵy barlyq jylý elektr ortalyqtary kúsheıtilgen jumys rejımine aýystyryldy, al páterler men úılerdegi jylý turaqty túrde qamtamasyz etilýde.
Eske salsaq, osyǵan deıin Shyǵys Qazaqstannyń Shanaǵatty aýylynda aıaz -56 gradýsqa deıin jetkeni habarlanǵan.