ShQO trassasynda bir adam kóz jumyp, úsheýi zardap shekti
ÓSKEMEN. QazAqparat – Shyǵys Qazaqstan oblysynda jol apatynan 1 adam kóz jumyp, úsheýi zardap shekti, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, jol-kólik oqıǵasy 15 qarashada saǵat 08:10 shamasynda bolǵan.
«Mercedes Benz E220» markaly avtokólikti tizgindegen 36 jastaǵy azamat jyldamdyqty ruqsat etilgen shekten asyryp jiberip, «Óskemen-Semeı» tasjolynyń 65 shaqyrymynda rýlge ıe bola almaı qaldy. Sonyń saldarynan aýdarylyp túsken kólik jyraǵa qulaǵan», - delingen aqparatta.
Jol apatynan 66 jastaǵy zeınetker til tartpaı ketti. Al jaraqat alǵan júrgizýshi men 47 jáne 23 jastaǵy eki jolaýshy aýrýhanaǵa jetkizildi.
Qazirgi ýaqytta atalǵan fakti boıynsha QR Qylmystyq Kodeksiniń 345-baby 3-bóligine sáıkes sotqa deıingi tergeý amaldary bastaldy. Birqatar sot-medıtsınalyq saraptama taǵaıyndalǵan.
