ShQO trassasynda adamdar men kólikterdi evakýatsııalaý aıaqtaldy
ÓSKEMEN. QazAqparat - Osy ýaqyttaǵy jaǵdaı boıynsha Shyǵys Qazaqstan oblysynda qar qursaýynda qalǵan kólikter men ondaǵy adamdardy evakýatsııalaý jumystary tolyǵymen aıaqtaldy. Bul týraly «Qazaqavtojol» JShS-dan málim etti, dep habarlaıdy QazAqparat tilshisi.
Kesheden beri boran saldarynan «Almaty-Óskemen» tas jolynyń 683-686 shaqyrym aralyǵynda 200-den astam kólik qańtarylǵan bolatyn. Oblystyq Tótenshe jaǵdaılar departamenti taratqan sońǵy málimet boıynsha, qar qursaýynda 700 adam qalǵan. Qazir olardyń sońǵy toby úılerine jol tartty.
Málimetke súıensek, saǵat 15.40-ta barlyq kólik túrleri úshin jol qaıta ashyldy. Ony keńeıte túsý úshin 9 tehnıka áli de damylsyz jumys isteýde.
«Táýlik boıy jaýǵan qar men borannan kólikter qańtarylyp, tórt qatarǵa tizilip qalǵan bolatyn. Osynyń saldarynan qozǵalysty qalpyna keltirý qıynǵa soqty. Negizinen jol eki jolaqqa ǵana arnalǵan. «Qazaqavtojol» mekemesiniń kúshimen jáne Tótenshe jaǵdaılar komıtetiniń kómegimen 200-den astam kólik shyǵarylyp, 400-den astam adam qaýipsiz jerge kóshirildi», - delingen mekemeniń baspasóz-málimetinde.
Degenmen, óńirde aýa raıynyń qolaısyzdyǵyna baılanysty eskertý áli de saqtalady. Keı jerlerde jeldiń jyldamdyǵy sekýndyna 20 metrge jetken. Sondyqtan, «Qazaqavtojol» mekemesi turǵyndardy alys saparǵa shyqpaýǵa shaqyryp otyr.
«Jolda qalǵan jolaýshylar men kólik ıeleri eldegi joldardyń jaǵdaıyn +7 7172 444 777 dıspetcherlik nómiri arqyly nemese +7 771 7444 777 WhatsApp nómiri arqyly bile alady» - delingen habarlamada. Atalǵan nómirler arqyly kólik isten shyqqan oryn týraly foto men beınematerıaldar jiberýge de bolady.
