ShQO taýlarynda jarylys jasalyp, 37 myń tekshe metr qar túsirildi

ÓSKEMEN. QazAqparat – Shyǵys Qazaqstan oblysynda jasandy jolmen qar kóshkini túsirildi, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, qar kóshkininiń aldyn alý sharasy búgin «Óskemen-Taýly Úlbi-Soltústik» tasjolynyń ýchaskesinde júrgizildi.

«Birneshe jarylys nátıjesinde barlyǵy 36 850 tekshe metr qar túsirildi. Óńirdegi profılaktıkalyq kóshkin túsirý jumystary birneshe kún boıy jalǵasyp jatyr. Oblystyń taýly jerlerinde kóshkin júrý qaýpi áli de joǵary», - delingen aqparatta.

Osy rette, qutqarýshylar óńir jurtshylyǵyna kún raıy qolaısyz bolǵanda alys saparǵa shyqpaý qajettigin, qandaı da bir qıyndyqqa tap bolǵan jaǵdaıda birden 112 nómirine qońyraý shalý kerektigin eskertedi.

Eske salsaq, 7 qańtar kúni oblys aýmaǵynda 3 ret qar kóshkini júrip, joldardy basyp qalǵan bolatyn.

Foto: ShQO Tótenshe jaǵdaılar departamenti