ShQO taýlarynda qar kóshkini júrýi múmkin
ÓSKEMEN. QazAqparat - Shyǵys Qazaqstan oblysyndaǵy taýly aımaqtarda qar kóshkini júrýi múmkin, dep habarlaıdy QazAqparat Habar 24 agenttigine silteme jasap.
Osyǵan baılanysty, óńirdegi selden qorǵaý mekemesiniń mamandary qaýiptiń aldyn alý sharalaryn ótkizip jatyr. Bıyl taý arasynan ótetin joldardaǵy qyrqalardyń boıynda qyryqtan astam jasandy jarylys jasalyp, 60 myń tekshe metr qar túsirilgen. Jalpy óńirde qar kóshkini bolatyn 500-ge jýyq qaýipti aýmaq bar. Onyń 336-sy qysta únemi baqylaýda bolady. Ol aımaqtarda eldimekender ornalasqan ári kólik joldary ótedi. Al qary qalyń mańdarǵa arnaıy belgiler qoıylǵan.
Bıyl taýly óńirde qardyń qalyńdyǵy 1 metrge jetip qalǵan.
«Bizdiń fılıalda 21 baqylaýshymyz bar. Kún saıyn olar qadaǵalap qar jaýǵannan keıin ózderiniń marshrýttarymen qardyń qalyńdyǵyn tekseredi. Qardyń ishki qurylysyn tekseredi. Qardyń tempratýrasyn tekserip, sodan bizge habarlap, biz qorytyndy jasaımyz. Sol boıynsha ár jerlerde profılaktıka jasaımyz», - deıdi «Qazseldenqorǵaý» MM oblystyq fılıaly basshysynyń orynbasary Esimhan Bátibaev.
