ShQO taýlarynan 2150 tekshe metr qar túsirildi

ÓSKEMEN. QazAqparat – Shyǵys Qazaqstan oblysynda jasandy jolmen qar kóshkini túsirildi, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, qar kóshkiniń aldyn alý sharasy «Óskemen-Samar» tasjolynda júrgizildi.

«Jol boıyndaǵy taýda jarylys jasalyp, 2150 tekshe metr qar túsirildi. Kóp uzamaı jol qardan tolyqtaı tazartylǵan. Jalpy óńir boıynsha 325 ýchaskede qar kóshkini júrý qaýpi bar», - deıdi «Qazseldenqorǵaý» ShQ fılıalynyń basshysy Omar Dúzgimbaev.

Óz sózinde ol turǵyndarǵa aldaǵy kúnderi taýly jerlerge barmaýǵa shaqyrdy. Qar kóshkini qaýpi bar ýchaskelerden ótip bara jatsańyz múlde toqtamaı, tezirek ketý kerek.

Eske salsaq, 21 jeltoqsan kúni ShQO-da qar kóshkini qaýpine baılanysty eki jol jabylǵandyǵy habarlanǵan.

Foto: ShQO Tótenshe jaǵdaılar departamenti baspasóz qyzmeti