ShQO tasjolynda jalǵyz qonjyq júr
ASTANA. KAZINFORM – Óskemen – Rıdder trassasynda júrgizýshi jol jıegine deıin jaqyndap kelgen qonjyqty kórgen, dep habarlaıdy Kazinform.
Áýesqoı túsirilimde kishkentaı jyrtqyshtyń jolǵa shyǵyp, artynsha ormanǵa qaraı júgirip ketkeni anyq kórinedi. Qonjyǵynyń janynda basqa aıýlar bolmaǵan.
Mamandardyń aıtýynsha, kúzdiń sońynda qonjyqtyń jalǵyz júrýi – alańdatarlyq jaǵdaı.
— Bizge bul jóninde eshqandaı shaqyrý túsken joq, biraq bul ahýaldy nazarda ustaımyz. Eger qonjyq anasyz qalǵan bolsa, ony qolǵa túsirýge týra keledi. Buryn Rıdderden tabylǵan qonjyq sııaqty, zoobaqpen kelisip, sonda jetkizý qajet bolady. Óıtkeni ol tabıǵatta jalǵyz ózi ómir súre almaıdy, - dedi ShQO orman sharýashylyǵynyń jedel jasaǵy.
Vedomstvo mamandary aıýdyń áli qystaýǵa ketpegenine alańdaýdyń qajet emestigin aıtady.
— Kúntizbe boıynsha áli kúz, qar jaýsa da. Aıýlar maı jınap úlgerýi múmkin, olar óz bıologııalyq tártibimen ómir súredi. Qıyny – qonjyqtyń jalǵyz júrýi. Ol jas, bul kezeńde ol anasynyń baqylaýynda bolýy kerek. Demek, aıýǵa birnárse bolǵan. Aıý uıyqtap qalyp, qonjyqtyń innen qashyp shyǵýy múmkin emes, — dep túsindirdi jedel jasaq ókilderi.
Qazir mamandar qonjyq baıqalǵan aýmaq týraly aqparat jınap jatyr. Orman qorǵaýshylar kez kelgen jabaıy ańnyń jol mańynda paıda bolýy olardyń da, adamdardyń da qaýipsizdigine qater tóndiretinin eske salady.
Buǵan deıin Rıdderde tabylǵan qonjyqtyń Óskemen zoobaǵyna jetkizilgeni habarlanǵan.