ShQO tasjoldarynda alǵash ret túrli-tústi lazerlik baǵdarlar qoldanyla bastady
ÓSKEMEN. KAZINFORM — Shyǵys Qazaqstan oblysyndaǵy eki respýblıkalyq mańyzy bar tasjolda júrgizýshilerge túngi ýaqytta jáne qolaısyz aýa raıynda joldy baǵdarlaýǵa kómektesetin lazerlik qondyrǵylar ornatyldy.
Jańa júıe Qalbataý-Maıqapshaǵaı tasjolynyń Tuǵyl aýyly mańyndaǵy jáne Almaty-Óskemen tasjolynyń Almasaı aýyly mańyndaǵy ýchaskelerine engizildi. Bul týraly «QazAvtoJol» UK» AQ ShQO fılıalynan málim etti.
Endi qarańǵy ýaqytta jol boıyna arnaıy jaryq syzyqtary proektsııalanady. Olar ásirese uzaq ári birsaryndy jol ýchaskelerinde júrgizýshiler úshin vızýaldy baǵdar qyzmetin atqarady.
— Lazerlik baǵdarlar júrgizýshilerge qozǵalys traektorııasyn dál saqtaýǵa kómektesedi. Mundaı jaryq sıgnaldary kádimgi jol tańbalaryna qaraǵanda jyldam qabyldanady, sonyń arqasynda jol jaǵdaıyna der kezinde áreket etýge múmkindik týady, — dedi «QazAvtoJol» ulttyq kompanııasy ShQO fılıalynyń dırektory Nurbek Temirhanov.
Mamandardyń aıtýynsha, bul júıe ásirese jańbyr, tuman, qar jaýý sekildi kóriný deńgeıi tómendegen jaǵdaılarda tıimdi. Óıtkeni sondaı kezde jol tańbalary anyq kórinbeı qalady.
Eske salsaq, osyǵan deıin Aqmolada jol apaty kezinde joǵary kerneýli elektr jelisi zaqymdanǵany habarlanǵan.
