ShQO: Tasqyn saldaryn joıýǵa 800 mln teńgeden astam qarjy bólinbek
ÓSKEMEN. QazAqparat - Naýryz aıynda ShQO boıynsha 3 myńǵa jýyq adam tasqynnyń zardabyn shekken, dep habarlaıdy QazAqparat tilshisi.
Qazirgi tańda Óskemen qalasy men Aıagóz, Glýbokoe, Shemonaıha, Katonqaraǵaı aýdandarynda jaǵdaı turaqtalyp keledi. 1914 adam óz úılerine qaıtqan. Aıagóz aýdanynda 16 otbasy, Katonqaraǵaı aýdanynda 4 otbasy qıraǵan úıleriniń ornyna jańa baspana aldy. Al Zyrıan aýdanynda Buqtyrma ózeniniń deńgeıi baıaý túsýine baılanysty 308 úı sý qursaýynda qalyp otyr.
«Sý kirgen úılerdiń 83-i qalpyna kelmesteı bolyp qıraǵany anyqtaldy. Óskemende 7 úı, Aıagózde 35 úı, Glýbokoe aýdanynda 21 úı, Shemonaıha aýdanynda 16 úı, Katonqaraǵaıda 4 úı qatty búlingen. Bul tek tekserýden ótken úıler. Sondyqtan bul san áli ósýi múmkin» - delingen tótenshe jaǵdaılar departamenti taratqan málimette.
Tasqynmen kúreske jalpy jıyny 407 tehnıka jumyldyrylyp, sý qaıtqan aýlalardyń tazalaýǵa 3100 erikti qatysqan eken. Jergilikti ákimdikter tasqyn zardabyn tartqan turǵyndarǵa úzbeı kómek berýde.
Oblys ákiminiń rezervinen tasqyn saldaryn joıýǵa 689,2 mln teńge qarastyrylyp otyr. Bul somanyń 195 mln teńgesi búginge deıin bólinip, baspana satyp alý jáne eldi mekenderdi qalpyna keltirý jumystaryna jumsaldy. Onyń 80 mln teńgesin Aıagóz aýdany, 40 mln teńgesin Shemonaıha aýdany, 75 mln teńgesin Glýbokoe aýdany ıgerdi. Al oblystyq «Paryz» qoryna úı jáne ózge kerek-jaraqtar satyp alý úshin jáne 150 mln teńge bólingen. Tasqyn bolǵan aýdan, qalalardyń ózinde de jergilikti qorlar arqyly aqshalaı jáne materıaldyq kómekter jınalýda. Mundaı izgi sharadan ózge óńirler de shet qalǵan joq. Astana, Pavlodar, Almaty, Batys Qazaqstan jáne Soltústik Qazaqstan oblystarynan kómek kelip túsýde.
