ShQO: Sýarmaly jerge tartylǵan 20 mlrd teńgeniń ınfraqurylymy ıgerilmegen
ÓSKEMEN. QazAqparat - Shyǵys Qazaqstanda sońǵy 4 jylda sýarmaly jerlerge 20 mlrd teńgeniń sýarý júıesi tartylǵan. Alaıda memleket qarjysyna tartylǵan sol ınfraqurylymdy el ıgiligine jarat almaı otyr, dep habarlaıdy QazAqparat tilshisi.
Bul týraly Aýyl sharýashylyǵy mınıstrliginiń Sý resýrstary komıtetiniń basshysy Islam Ábishev aıtty. Kókpekti aýdanynda ótken-semınar keńeske sýarmaly alqap ıeleri men jergilikti sala basshylary qatysqan bolatyn.
Aýyl sharýashylyǵyn damytý baǵdarlamasyna sáıkes, 2020 jylǵa qaraı Shyǵys Qazaqstanda 92 myń gektar sýarmaly jerdiń sharýalardyń ıgiligine berilýi qajet. Odan keıingi kezeńde 200 myń gektardan astam alqapqa qajetti ınfraqurylym tartý kózdelgen. Respýblıka bıýdjetinen qomaqty qarjy bólinip, ınfraqurylym tartylyp jatqanymen, sýarmaly jerge ketpen túspeı tur. Semınarda osynyń sebep-saldary talqylandy. Sý resýrstary komıtetiniń málimeti shynymen oılanarlyq. Sýarý júıesimen qamtylǵanyna qaramastan, qańsyp jatqan alqap myńdaǵan gektarǵa jetetini aıtyldy. Tarbaǵataı aýdanynda - 4575 ga, Úrjar aýdanynda - 8,5 myń ga, Jarma aýdanynda - 789 ga alqap ıgerilmeı jatyr. Al Zaısan qalasynyń mańaıyndaǵy 1855 gektar alqapqa sýarý magıstrali tartylǵanymen, onyń tek 100 gektary ǵana el ıgiligine berilgen eken.
«Sýarmaly jerdiń 1 gektarynan bir maýsymda eń kem degende 1 mln teńge tabys tabýǵa bolady. Joǵaryda atalǵan aýdandardyń esebinen 4 jylda bólgen 20 mlrd teńgeni 1 ǵana maýsymda aqtap alýǵa bolar edi. Biraq jergilikti ákimderge sýarmaly jerdiń el ıgiligine jaraýy qajet emes sııaqty. Nebir mańyzdy jobalardyń aýzynan jyryp, qarjyny sizderge bóldik. Óıtkeni, aýdan ákimderi men oblys ákiminiń sol kezdegi orynbasary 55 myń gektar sýarmaly alqapqa jergilikti sharýalar muqtaj bolyp otyrǵanyn jazbasha málimdegen bolatyn. Biz óz tarapymyzdan kanaldardy qaıta qalpyna keltirip, sý jetkizip berdik. Endi sol muqtaj degen sharýalardyń bireýi joq. Memleket qarjysyn bulaı jelge ushyrýǵa jol berilmeıdi. Bul másele oblys ákimi men Úkimet basshysynyń aldyna qoıylatyn bolady», - dedi Islam Ábishev.
Sýarmaly alqap ıeleri tartylǵan ınfraqurylymnyń paıdaǵa aspaı jatýynyń bir sebebi taý ózenderiniń kóbi kúzge qaraı tartyla bastaıtynymen túsindirdi. Ásirese, Tarbaǵataı men Qalbataý silemderinen bastaý alatyn ózenderde tamyz aıyna qaraı sý azaıyp qalatyn kórinedi. Sonyń saldarynan sý magıstralderge jetpeı jatyr. Dıqandar osy problemany birjola joıý úshin kanaldardyń basyna sý qoımalaryn ornatý qajet degen usynys aıtty.
