ShQO sý qoımalaryna keshendi tekserý júrgizý qajet - senator

ASTANA. QazAqparat – Shyǵys Qazaqstandaǵy 15 myńnan astam turǵyndy sý basý qaýpi tónip tur. Bul jaıynda Premer-Mınıstr Álıhan Smaıylovqa depýtattyq saýal joldaǵan senator Olga Býlavkına aıtty, dep habarlaıdy QazAqparat tilshisi.

Depýtattyń aıtýynsha, Úıdene sý qoımasy 10 jylǵa jýyq ýaqyttan beri apatty jaǵdaıda tur. 2017 jyldan bastap bógetti jańǵyrtý jumystary bastalǵan bolatyn. Alaıda qarjylandyrýdyń bolmaýyna baılanysty joba tek 35%-ǵa oryndaldy. Daıyndalǵan jobalaý-smetalyq qujattardyń merzimi aıaqtaldy, sonymen qatar onda basty sýaǵardyń negizgi jóndeý-qalpyna keltirý jumystary qarastyrylmaǵan bolyp shyqty. Aımaqtaǵy basqa da birqatar sý qoımasynda kúrdeli jaǵdaı qalyptasyp otyr.

«Shyǵys Qazaqstan oblysyndaǵy budan basqa taǵy eki sý nysany boıynsha da osyndaı jaǵdaı bolyp otyr. Máselen, Tarbaǵataı aýdanynyń Qandysý sý qoımasy men Kúrshim aýdanynyń Orta-Terekti sý qoımasy 2019-2021 jyldar aralyǵynda jóndelýi tıis edi. Bógetter tasqyn sýdan buzylǵan jaǵdaıda sý basý aımaǵynda 15,5 myń adam qalyp qoıady. Magıstraldyq jáne sharýashylyq ishilik arnalardyń tehnıkalyq jaı-kúıiniń nasharlyǵy tasymaldaý kezinde kóp mólsherdegi sýdyń joǵalýyna ákelip soǵady. Bul sý qoımalary apatty jaǵdaıda bolǵandyqtan aýyldyq eldi mekenderdi aýyz sýmen qamtamasyz etetin birden-bir kóz bola almaıdy. Sýarý úshin sý berý múmkindigi de joq, demek ol daqyldar ónimdiliginiń tómen bolýyna ákeledi»,- dedi Olga Býlavkına Senattyń jalpy otyrysynda.

Senator sonymen qatar, jerdiń tozýy da osy aýdandardaǵy asa mańyzdy áleýmettik-ekonomıkalyq jáne ekologııalyq problema bolyp tabylatynyn atap ótti. Depýtat aýdan halqynyń eń mańyzdy tabys kózi – agrarlyq kásipkerlik pen mal sharýashylyǵy salasyn damytý bolyp tabylatynyn eskere otyryp, birqatar usynys aıtty.

«Óńir turǵyndarynyń ómirine qaýip tóndirip turǵan avarııalyq jaǵdaıǵa oraı ShQO sý qoımalaryna keshendi tekserý júrgizýdi suraımyn. Tótenshe jaǵdaılardyń aldyn alý úshin oblystyń avarııalyq jaǵdaıdaǵy sý obektilerinde qarjyny Úkimet rezervinen ýaqtyly bólý kerek. Shekara mańyndaǵy aýdandardyń strategııalyq mańyzyn eskere otyryp, agrarlyq sektordy qoldaý úshin sý kózderin tolyqqandy paıdalaný problemasyn jan-jaqty qaraý kerek. Osy obektilerde jóndeý jumystarynyń merzimderin qysqartý, ártúrli deńgeıdegi memlekettik organdar arasyndaǵy bıýrokratııalyq kedergilerdi azaıtý úshin joǵaryda atalǵan sharalardyń iske asyrylýyn baqylaý úshin biryńǵaı ortalyq atqarýshy organ aıqyndalsyn», - dedi Olga Býlavkına.