ShQO stýdentterine 9 jataqhana qajet

ÓSKEMEN. QazAqparat - Shyǵys Qazaqstanda stýdentterdi jataqhanamen qamtý isine jeke kompanııalar tartylýy múmkin. Oblys ákiminiń orynbasary Ásem Núsipova ekijaqty seriktestiktiń jol kartasy da daıyndalǵanyn aıtady, dep habarlaıdy QazAqparat tilshisi.

Ákimdiktiń keńeıtilgen apparat keńesinde Elbasynyń bes áleýmettik bastamasyn iske asyrý barysy talqylandy. Ásem Núsipovanyń aıtýynsha, oblys boıynsha 4650 stýdent jataqhanaǵa muqtaj. Osy suranysty qamtamasyz etý úshin 9 ǵımarat salý qajet.

-Boı kóterýi tıis jataqhanalardyń 3 tıptik jobasyn daıyndadyq. Olar, 5,7 jáne 9 qabatty bolmaq. Ázirge Bilim jáne ǵylym mınıstrligi olardyń qandaı kózden qarjylandyrý kerektigin naqty aıtqan joq. Bizdiń óńirde memlekettik-jekeshelik áriptestigi jaqsy jol qoıylǵanyn eskerip, osy baǵytta jol kartasyn daıyndadyq» - dedi ákimniń orynbasary.

Oblystyń ákimi Danıal Ahmetov qurylys, sáýlet jáne qala qurylysy basqarmasyna atalmysh jol kartasyn, taldaýdy tapsyrdy.  Qazirgi tańda óńirdegi jetekshi oqý oryndaryna jataqhana úshin jer bólingen. Al keıbir bilim oshaqtary jataqhana tapshylyǵyn aıaqsyz qalǵan qurylys nysandarynyń esebinen sheshýde.