ShQO stýdentteri pandemııa ýaqytynda aýdandyq aýrýhanalarǵa kómektesýde

Ýnıversıtet ókilderiniń aıtýynsha, aýyldardaǵy medıtsınalyq uıymdarda jas mamandardyń jetispeýshiligi baıaǵydan bar. Pandemııa kezinde bul problema tipti ótkir bolyp tur. Aýdandardaǵy áriptesterine qoldaý kórsetý úshin Semeıdegi medýnıversıtettiń úzdik stýdentteri, sonyń ishinde anestezıolog-reanımatolog Ernar Qojamberdınov kómek kórsetýge bel býǵan.

Jas maman dáriger bolýdy bala kezden armandapty. Áıtse de ol kúnderdiń kúninde álem qaýipti vırýspen betpe-bet keletinin, tipti barlyq el zardap shegetinin elestete almaǵan eken. Іndet elimizdi qursaýyna alǵandyqtan jas jigit oǵan qarsy kúresten syrt qala almapty.

«Bala kezimnen dáriger bolǵym keldi. Óıtkeni olardyń jumysy qanshalyqty mańyzdy ekenin, adamdarǵa qalaı kómektesetinin, halyqtyń ómiri men densaýlyǵy úshin qalaı kúresetinin kórdim. Sondyqtan mektepti bitirgennen keıin men ózim úshin qaı ýnıversıtetti tańdaıtynymdy bildim. 2011 jyly Semeıdegi ýnıversıtettiń «Jalpy medıtsına» mamandyǵy boıynsha aqyly bólimge oqýǵa túsip, bir jyldan keıin bilimimniń jaqsy ekenin kórsetip, KTA-ny qaıta tapsyryp, grantqa ıe boldym. 2017 jyly bakalavr dárejesin aldym. Eki jyl «Hırýrgııa» mamandyǵy boıynsha ınternatýrada oqyp, qazir «Anestezıologııa jáne reanımatsııa, onyń ishinde balalardy emdeý» mamandyǵy boıynsha oqıtyn birinshi kýrstyń rezıdentimin», - dedi E.Qojamberdınov.

Búgingi kúni jas maman Úrjar aýdanynyń Maqanshy aýylyndaǵy aýdandyq aýrýhanada áriptesterimen jumys isteýde.

«Ózim shaǵyn ǵana Shar qalasynanmyn. Balalyǵym, mekteptegi kezim sol jerde ótti. Sol sebepti aýdandyq aýrýhanalarǵa mamandardyń jetispeı jatqanyn burynnan bilem. Maqanshyǵa kelgenime qýanamyn. Aýdandyq aýrýhananyń ujymy - shaǵyn bolsa da berekesi jarasqan adamdar», - deıdi jas maman.

Aýdandyq aýrýhanada reanımatolog bolyp jumys isteıtin Ernar provızorlyq aýrýhananyń taptyrmas qyzmetkeri atanyp otyr. Nege deseńiz, keıingi kezde munda pnevmonııanyń aýyr túrine shaldyqqan patsıentter kóbeıip ketken eken. Jas maman óziniń aǵa-áriptesterimen birge adam ómirin saqtap qalý jáne vırýstyń odan ári taralýyn boldyrmaý úshin qoldan kelgeniniń bárin jasaýda.

«Jalpy, meniń negizgi jumysym ıntensıvti terapııa salasy. Alaıda qazirgi pandemııaǵa baılanysty jumysty tańdap-talaıtyn emes - provızorlyq aýrýhanada keńes beremin. Ókinishke qaraı naýqas kóp, kóbi ókpeni jasandy jeldetý apparatyn qajet etedi. Keshikpeı, ókpeniń ıntýbatsııasyn ýaqytynda júrgizý mańyzdy. Mundaıda ár sekýnd qymbat. Baqytymyzǵa oraı, bul jerde myqty komanda bar. Bizdiń tájirıbeli reanımatologymyz Jandos Talǵatuly árqashan kómektesýge jáne qoldaýǵa daıyn. Shtatta úsh hırýrg bar. Qansha qıyn bolsa da, biz kúresip jatyrmyz», - deıdi Ernar.

Reanımatologtyń jumys tártibi tyǵyz. Jas mamanǵa qazirgi jaǵdaıǵa beıimdelýden basqa amal da joq eken. Qatelikke jol berýdiń quny – adam jany. Biliktilik pen bilim, daryn – óz nátıjesin berip, Ernar ózine artylǵan mindetti jaqsy atqaryp jatyr.

«Iá, ońaı bolmasa da barymyzdy salyp jatyrmyz. Naýqastyń jaǵdaıyna baılanysty em-dom júrgizip, ıntýbatsııa jáne basqa reanımatsııalyq sharalardy jasaımyz. Biraq keıde bárine daıyn bolý múmkin emes. Máselen, taıaý kúnderi skarlatınanyń ótkir formasymen 13 jastaǵy qyz bala tústi. Aýrýyna baılanysty ıntoksıkatsııa anyqtaldy. Aldymen biz onyń dıagnozyn anyqtaı almadyq, óıtkeni pedıatr demalysta edi. Negizinen, aýrýhanada osy mamandyq boıynsha dárigerler jetispeıdi. Men buryn óz tájirıbemde skarlatınamen, ásirese aýyr túrimen kezdesken emespin. Biraq biz ony der kezinde anyqtap, emdeýdi bastadyq. Úshinshi kúni qyz bala birtindep qalpyna kele bastady», - deıdi reanımatolog.

Tamyz aıynyń ortasynda Ernardyń aýdandyq aýrýhanadaǵy jumysy aıaqtalady. Jas rezıdent úshin bul teńdessiz tájirıbe, al aýdandyq aýrýhana úshin aıtarlyqtaı qoldaý. Erlan áli rezıdentýrada eki jyldaı oqýy kerek. Ary qaraı qaıda baryp jumys isteıtinin jas maman sheshpepti.

«Eń bastysy pandemııany eńsersek boldy. Adamdardy qutqaryp qalýymyz kerek. Odan keıin kóre jatarmyz», - deıdi Ernar.