ShQO stýdentteri Qytaıda janýarlarǵa ota jasady
ÓSKEMEN.QazAqparat - Bir aı boıy Qytaıda mal dárigerligi boıynsha óndiristik tájirıbeden ótken shyǵysqazaqstandyq stýdentter elge oraldy, dep habarlaıdy «QazAqparat» HAA tilshisi.
«Bizdiń jeti stýdentimiz Baqyt Aıtbaevanyń jetekshiligimen Chantszı qalasynda bilimderin shyńdap keldi», - deıdi Zaısan tehnologııalyq kolledjiniń dırektory Erik Seıilhanov.
ShQO ákimdigi baspasóz qyzmetiniń habarlaýynsha, Qytaıda oqytý ótken jyly Shyǵys Qazaqstan oblysy basshylyǵy men Qytaı Halyq Respýblıkasynyń Shyńjań-Uıǵyr avtonomııalyq ólkesi arasynda jasalǵan memorandým aıasynda ótkizildi. Osy kelisimniń arqasynda Zaısan tehnologııalyq kolledji men Shyńjań agrarlyq kásibı-tehnıkalyq ınstıtýty arasynda jaqsy baılanys ornady.
Qytaılyq áriptester Shyǵys Qazaqstannan kelgen stýdentterdi joǵary oqý ornynyń erejeleri jáne qaýipsizdik tehnıkalarymen tanystyryp, oqý korpýsy, mýltımedıa jáne lıngafon kabınetterin aralatty.
«Tájirıbe 60 saǵattan artyq jasaldy, - deıdi Baqyt Aıtbaeva. - Instıtýttyń zertteý-tájirıbelik ortalyǵy eń sońǵy úlgidegi tehnıkalarmen: medıtsınalyq dári-dármekter, hırýrgııalyq otalarǵa arnalǵan quraldar, rentgen jáne ÝDZ apparattarymen jabdyqtalǵan».
Tájirıbeden ótýshi stýdentter qytaı farmokologııasynyń erekshelikterimen tanysyp, aýrý janýarlarǵa dıagnoz qoıdy jáne olarǵa ota da jasady.
