ShQO Sholpan aýylyndaǵy sary aýrýǵa qatysty jańa málimetter belgili boldy
ASTANA. QazAqparat - QR Densaýlyq saqtaý mınıstrligi mamandary qatysýymen qurylǵan arnaıy komıssııa Úrjar aýdanyna qarasty Sholpan aýylyndaǵy jumysyn qortyndylady. Jumys qortyndysy boıynsha, 5 aı ishinde 12 bala gepatıt A dertine shaldyqqany resmı rastaldy, dep habarlaıdy «QazAqparat» HAA tilshisi.
ShQO aqparattyq ortalyǵynyń habarlaýynsha, arnaıy komıssııany ShQO Qoǵamdyq densaýlyq saqtaý departamenti basshysynyń orynbasary Nurlanǵazy Ibraev basqarǵan. Komıssııa quramyna QR Densaýlyq saqtaý mınıstrliginiń sarapshylary engen. Respýblıkalyq komıssııamen qatar, oblystyq densaýlyq saqtaý basqarmasynyń komıssııasy da qurylǵanyn aıta ketken jón. Oǵan basqarma basshysy Raıfa Safıollınova jetekshilik etti.
Komıssııa jumysy barysynda Úrjar aýdandyq ortalyq aýrýhanasynyń bas dárigeri J.B.Tileýberlınniń BAQ ókilderine balalardyń A gepatıti juqpasyn juqtyrýyna qatysty jańylys aqparat bergeni anyqtaldy.
«2018 jylǵy qańtar aıynyń 16 kúni belgili bolǵan aqparat kelesideı: 2017 jylǵy qyrkúıek aıy men 2018 jylǵy qańtar aıy aralyǵynda naýqaspen qarym-qatynasta bolǵan 46 bala tekserýden ótti. Olardyń 25-i aýdandyq aýrýhananyń juqpaly aýrýlar bólimshesine jatqyzylǵan. Bólimshege jatqyzylǵandardyń 12-sinde sary aýrý dıagnozy rastalyp otyr», - dep habarlaıdy ShQO aqparattyq ortalyǵynan.
Respýblıkalyq jáne oblystyq komıssııa Sholpan aýylyndaǵy dárigerlik ambýlatorııaǵa taǵy 19 adamnyń medıtsınalyq kómekke júgingenin anyqtap otyr. Alaıda aýdandyq aýrýhana basshylyǵynyń epıdemıologııalyq jaǵdaıǵa nemquraılyǵy kesirinen aýdannyń qoǵamdyq densaýlyq saqtaý basqarmasyna ambýlatorııa basshylyǵy dereý málimet bermegen. Osynyń saldarynan 19 naýqas resmı statıstıkaǵa engizilmeı qalǵan. Olardyń barlyǵy der kezinde ambýlatorııalyq deńgeıde emdeýden ótken. Qazirgi ýaqytta olardyń densaýlyǵy qalypty.
Komıssııaǵa Sholpan aýylynyń turǵyndary tarapynan kámelettik jasqa tolmaǵan balany Úrjar aýdandyq ortalyq aýrýhanasyna jetkizý úshin jáne dári-dármek alý úshin ata-anasynyń aqsha tólegeni jaıly shaǵym tústi.
Qazirgi ýaqytta bir balanyń qaıtys bolýyna baılanysty qyzmettik tekserý júrgizilip jatyr. Mamandar atalmysh aýyldaǵy marqum bolǵan qyz balada gepatıttiń A túri emes, fýlmınantty, ıaǵnı basqa aýyr túri men ótkir baýyr nekrozy bolýy múmkin dep otyr. Qorytyndysy ІІB tekserý amaldarynan keıin jarııalanady.
Jalpy, tekserý nátıjesinde aýdandyq ortalyq aýrýhana basshylyǵy óreskel buzýshylyqtarǵa jol bergen: turǵyndarǵa medıtsınalyq kómek kórsetý men onyń sapasyn qadaǵalaý nemquraıly júrgizilgen, sanıtarlyq talap erejesi oryndalmaı, dıagnostıka jasaý men emdeý hattamasy saqtalmaǵan, tirkeýge alý-esep berý qujattary durys júrgizilmegen.
Anyqtalǵan buzýshylyqtar boıynsha taıaý arada Úrjar aýdandyq ortalyq aýrýhanasyndaǵy jaýapty tulǵalarǵa qatysty shara qoldanylatyn bolady.
«Al ázirge juqpaly A gepatıtine qatysty oblys pen Úrjar aýdanynda jaǵdaı turaqty. Sholpan aýlyna keler bolsaq, naýqastarmen qatynasta bolǵan 140 balaǵa juqpaly A gepatıtine qarsy ekpe jasalǵan. Barlyq úıler men aýyldaǵy mektepke dezınfektsııa jasalyp, aýyz sýdan 62 ret synama alynyp, taza ekeni anyqtaldy», - dep habarlaıdy ShQO aqparattyq ortalyǵynan.
