ShQO sharýalary kún panelderi boıynsha sýbsıdııa baǵdarlamasynan keıin mıllıondaǵan qaryzǵa batty
ÓSKEMEN. KAZINFORM – Shyǵys Qazaqstan oblysynyń fermerleri jaıylymdardy sýmen qamtamasyz etýge baǵyttalǵan baǵdarlamaǵa qatysqannan keıin mıllıondaǵan qaryzǵa batty.
Shottaryn buǵattap tastady
Baǵdarlama júzege asyrylǵannan birneshe jyl ótken soń aýyl sharýashylyǵymen aınalysatyn kásip ıelerinen aqsha óndirile bastady. Tipti keıbir sharýashylyqtardyń esepshottaryn paıdalanýǵa tyıym salynǵan.
Fermerlerdiń aıtýynsha, kópshiligi sot sheshimderi týraly jeke sot oryndaýshylary olardyń banktik shottaryn buǵattaǵannan keıin ǵana bilgen.
– Sot oryndaýshylary barlyq esepshottarymdy buǵattap tastady. Ol jerde tehnıkaǵa alǵan nesıemdi tóleımin dep saqtalǵan aqsham jatqan. Endi nesıeni tóleıtin qarajat joq, - deıdi fermer Asan Chıchakov.
Basqa da aýyl sharýashylyǵy taýaryn óndirýshiler sot sheshimderi shyqqan soń ǵana habardar bolǵandaryn aıtady. Keıbir jaǵdaılarda sot oryndaýshylarynyń shyǵyndaryn qosa eseptegende fermerlerden óndiriletin soma 800 myń teńgeden asady.
Máseleniń mán-jaıy
2020 jyly óńirde jaıylymdardy sýlandyrý ınfraqurylymyn qurý baǵdarlamasy iske asyrylǵan bolatyn. Sol kezde oblystyq aýyl sharýashylyǵy basqarmasy, qarjylyq operator – «MD Ekoservıs» JShS jáne Shyǵys Qazaqstan men Abaı oblystaryndaǵy 395 sharýa qojalyǵy arasynda úshjaqty kelisimsharttar jasalǵan.
Jaıylymdardy sýmen qamtamasyz etýge arnalǵan jabdyqtardy, sonyń ishinde kún panelderin satyp alýǵa kompanııalarǵa bıýdjetten shamamen 980 mln teńge bólingen. Keıin bul baǵdarlamanyń júzege asyrylýyna qatysty qylmystyq tergeý bastalǵan edi. ShQO aýyl sharýashylyǵy basqarmasynyń burynǵy basshysy men kompanııa jetekshisi qylmystyq jaýapkershilikke tartylǵan-tuǵyn.
Oblystyq aýyl sharýashylyǵy basqarmasynyń málimetinshe, jabdyqtar sharýashylyqtarǵa lızıngtik shema boıynsha berilgen.
– Jabdyq qunynyń 80 paıyzy memlekettik qarajat esebinen tólendi, al qalǵan 20 paıyzyn aýyl sharýashylyǵy taýaryn óndirýshiler ózderi óteýi tıis bolǵan. Qazir kompanııa men sharýashylyqtar arasynda sot protsesteri jalǵasyp jatyr. Biz jaǵdaıdy muqııat zerdelep, máseleni sheshýdiń múmkin joldaryn qarastyrýdamyz, - dedi basqarma basshysy Ajar Qadjıbekova.
Al fermerlerdiń aıtýynsha, keıbir kún panelderi múlde ornatylmaǵan. Bastapqyda jaıylymdyq mal sharýashylyǵyn damytýǵa baǵyttalǵan baǵdarlama aqyr sońynda olar úshin qarjylyq ári quqyqtyq máselege aınalyp otyr.
Eske salsaq, osyǵan deıin fermerlerdiń nesıe paıyzyn jeńildetýge 353,5 mlrd teńge bólinetindigi habarlanǵan.