ShQO: Sarapshylyq top kásipkerlerdiń máselesin bir saǵatta sheship bermek
ÓSKEMEN. QazAqparat -Shaǵyn bıznesti damytý boıynsha qoǵamdyq keńes saraptamalyq jumys tobyn qurdy. Top óziniń birinshi basqosýynda Óskemendegi ındýstrııalyq aımaqtardy ıgerý máselesin talqylady, dep habarlaıdy QazAqparat tilshisi.
«Saraptamalyq jumys toby bir-birimizge tolassyz hat jazyp, bir-birimizdi áýrege salmas úshin quryldy. Qaǵazbastylyqtyń kesirinen qanshama ýaqyt zaıa ketetinin bilesizder. Munda talqylanatyn baǵyt boıynsha sarapshylar jınalyp, kez kelgen máseleni bir saǵattyń kóleminde sheshetin bolamyz», - deıdi jumys tobynyń jetekshisi, Eýropa damý jáne qaıta qurý bankiniń strategııalyq menedjment jáne marketıng baǵdarlamasy jónindegi keńesshisi Elena Berezınskaıa-Ábilova.
Jıynda jergilkti ákimdik pen «Atameken» kásipkerler palatasynyń, «Ertis» áleýmettik kásipkerlik korporatsııasynyń, «Damý» qorynyń mamandary shaǵyn bıznes ókilderiniń qordalanǵan máselelerine qulaq túrdi.
Qatysýshylar shaǵyn bıznestiń aldynda kóptegen kedergiler bar ekenine toqtalyp, ǵylym men óndiristiń arasy alshaqtap ketkenin, jergilikti ǵalymdardyń jobalary qaǵaz betinde qalyp qoıyp jatqanyn aıtty. Al óz isin bastaǵysy kelgen jastar kásibin dóńgeletip áketýdiń tıimdi joldarynan beıhabar.
«Ertis» ÁKK ókiliniń aıtýynsha, bıznesmender salany damytý úshin memleket tarapynan jasalǵan ıgilikterdiń ózin durys paıdalanbaı otyr. Sonyń aıqyn dáleli - jartylaı ǵana júktelip turǵan ındýstrııalyq aımaqtar. Bul másele ındýstrııalyq aımaqtardy damytý týraly zań jobasy daıyndalyp jatqan búgingi tańda ásirese ózekti. Shyǵys Qazaqstan boıynsha mundaı aımaqtar Óskemen men Semeı qalasynda qurylyp, qajetti ınfraqurylym tolyq tartylǵan. Tek Óskemenniń ózinde úsh birdeı ındýstrııalyq aımaq bar. Jıynǵa qatysýshy bıznes ókilderi osy aımaqtarǵa iri bısnes nysandarymen birge shaǵyn kásipkerler de kirse degen pikirlerin bildirdi.
