ShQO saqshylary qujatsyz júrgen Nıgerııa azamatyna kómektesip, alǵys arqalady
ÓSKEMEN. QazAqparat - Shyǵys Qazaqstan oblystyq polıtsııa departamentine Afrıkadan alǵys hat kelip tústi, dep habarlaıdy QazAqparat tilshisi.
Hat ıesi - Obasi Churchil Emmanuel atty nıgerııalyq azamat. Ol óz hatynda polıtsııa departamentiniń kapıtany Danııar Mákenǵalıǵa qaltqysyz kómegi úshin alǵys bildirgen. Shyǵys Qazaqstanda júrgende afrıkalyq azamat tólqujaty men Qazaqstan aýmaǵynda turaqty turýǵa berilgen ruqsat qaǵazyn joǵaltyp alsa kerek. Qujattardyń qashan jáne qalaı joǵalǵanyn ózi de bilmeıdi. Qazaqstanda Nıgerııa elshiliginiń joqtyǵy ony odan saıyn tyǵyryqqa tireı túsken. Reseıdegi Nıgerııa konsýldyǵyna qońyraý shalǵan jigittiń bul áreketinen de esh nátıje shyqpaıdy. Óıtkeni Qazaqstan aýmaǵynan qujatsyz shyǵyp ketý múmkin emes-ti. Amaly quryǵan nıgerııalyq kóshi-qon qyzmetine júginip, qajetti anyqtamany alýǵa bekinedi.
«Baqytyna oraı, joǵalǵan qujattar adal qolǵa, ıaǵnı, polıtsııa qyzmetkeriniń qolyna túsken. Saqshy olardy «Ivýshka» aýdanynan taýyp alǵan. Joǵalǵan qujattyń ıesin polıtsııa ókili kóp uzamaı anyqtaıdy. 38 jastaǵy afrıkalyqty tirkelgen mekenjaıy boıynsha taýyp alyp, qujattaryn qaıtardy» - delingen polıtsııa departamenti taratqan aqparatta.
Saqshynyń qyraǵylyǵyna rıza bolǵan nıgerııalyq azamat polıtsııa basshylyǵyna alǵysyn aǵylshyn tilinde jazǵan hatymen bildiripti.
