ShQO rýdnıginde ekinshi jumysshy topyraq astynan shyǵaryldy

Shyǵys Qazaqstan oblysy Glýbokoe aýdanyndaǵy kenishte topyraq astynda qalǵan ekinshi jumysshy aman-esen shyǵaryldy, dep habarlaıdy Kazinform.

Glýbokoe aýdany Altaı kentindegi kenishte topyraq astynda qalǵan jumysshyny qutqarý úshin ShQO Tótenshe jaǵdaılar departamentiniń bastyǵy Erǵalı Bahaev pen apattyq-qutqarý jumystaryn júrgizý boıynsha arnaıy qyzmetter ózara birlesip áreket etti. 32 jastaǵy jumysshy saǵat 19.00 shamasynda aman-esen topyraq astynan shyǵaryldy.«Taý-ken qutqarýshylary men Apattar medıtsınasy ortalyǵynyń dárigerleri er adamdy alyp shyqty. Qazir onyń densaýlyǵyn tekserip, qajetti kómek kórsetip jatyr», – dep habarlady oblystyq Tótenshe jaǵdaılar departamentiniń baspasóz qyzmetinen.

Osy rette, departament bastyǵy Erǵalı Bahaev qutqarý is-qımyldary barysynda úılesimdi jumys istegen barlyq qyzmetterdiń ókilderine alǵysyn bildirdi.

Eske salsaq, búgin ShQO-daǵy kenishte eki jumysshy topyraq astynda qalǵan bolatyn. Onyń biri aman-esen qutqarylǵan soń birden Glýbokoe aýdanyndaǵy aýrýhanaǵa jetkizildi.