ShQO prokýratýrasy ekologııaǵa keltirilip jatqan zalalǵa qatysty taldaý júrgizdi
ÓSKEMEN. QazAqparat – Shyǵys Qazaqstan oblysynyń prokýratýrasy ekologııaǵa keltirilip jatqan zalalǵa qatysty taldaý júrgizdi, dep habarlaıdy QazAqparat tilshisi.
Prokýratýranyń alqa otyrysynda ekologııalyq zańnamanyń saqtalýy jáne osy baǵytqa jaýapty memlekettik organdar qyzmetiniń tıimdiligi máseleleri talqyǵa salyndy. Jıynǵa oblys ákiminiń orynbasary Erjan Nurbaev, quzyrly memlekettik mekemelerdiń basshylary, tabıǵat paıdalanýshy iri kompanııalardyń ókilderi qatysty.
«Shyǵys Qazaqstan tústi metallýrgııa men taý-ken óndirý ónerkásibin damytýdyń zor áleýetine ıe. Óńirde 600-den astam kásiporyn, onyń ishinde 100-den astam iri kásiporyn jumys isteıdi. Alaıda bul qorshaǵan ortaǵa eleýli zııan keltiredi. Júrgizilgen taldaý kórsetkendeı, óndiristik kompanııalardyń tabıǵatty qorǵaý is-sharalaryn qarjylandyrýyna jáne ýákiletti memlekettik organdardyń ekologııalyq zańnamany qamtamasyz etý jónindegi jumystaryna qaramastan, kemshilikter oryn alýda», - dedi oblys prokýrory Almat Baısholaqov.
Onyń aıtýynsha, iri óndiristik kásiporyndar bolsa da Jańa-Buqtyrma jáne Jezkent kentterinde «Qazgıdromet» RMK atmosferalyq aýanyń jaı-kúıiniń sapaly monıtorıngin qamtamasyz etpeıdi. Óskemen qalasynda baqylaý beketteri tıisti jerlerde ornalaspaǵan.
«Eldi mekender sheginde atmosferalyq aýaǵa jáne kógaldandyrýǵa qoıylatyn talaptardy retteıtin qajetti normatıvtik-quqyqtyq aktiler joq. Aýyldardy kógaldandyrý jumystary retsiz júrgiziledi. Jergilikti atqarýshy organdar 2022-2024 jyldarǵa arnalǵan tabıǵatty qorǵaý is-sharalarynyń josparyna Óskemen, Semeı jáne Rıdder qalalarynda atmosferalyq aýany qorǵaý jónindegi is-sharalardy engizbegen», - dedi A.Baısholaqov.
Avtokólikter de ekologııaǵa aıtarlyqtaı keri áser etedi. Óńir aýmaǵynda tirkelgen 342 myń kóliktiń 252 myńy 10 jyl buryn shyǵarylǵan.
«Barlyq anyqtalǵan buzýshylyqtar boıynsha oblys prokýratýrasymen prokýrorlyq qadaǵalaý aktileri engizildi. Otyrys qorytyndysy boıynsha memlekettik organdar men uıymdardyń aldyna naqty mindetter qoıyldy. Oblys ákiminiń atyna jalpy jaǵdaı týraly aqparattyq hat joldandy. Óndiristik kásiporyndarǵa qolaısyz meteojaǵdaılar kúnderi óndiris kólemin jáne atmosferaǵa lastaýshy zattar shyǵaryndylaryn azaıtý sharalaryn qabyldaý usynyldy. Bul baǵyttaǵy jumystar aldaǵy ýaqytta da jalǵasady», - dep habarlady ShQO Prokýratýrasynyń baspasóz qyzmeti.
