ShQO polıtseılerine 198 jańa qyzmettik avtokólik berildi
ASTANA. KAZINFORM — Shyǵys Qazaqstan oblysynda polıtsııa qyzmetkerlerine 198 jańa qyzmettik avtokóliktiń kiltteri tabystaldy, dep habarlaıdy oblys ákimdiginiń baspasóz qyzmeti.
Bul ishki ister organdarynyń materıaldyq-tehnıkalyq bazasyn nyǵaıtýǵa jáne azamattardyń qaýipsizdigin qamtamasyz etý sapasyn jaqsartýǵa baǵyttalǵan mańyzdy qadam.
Oblys ákiminiń aıtýynsha, avtoparkti jańartý — quqyq qorǵaý organdaryna kórsetiletin júıeli qoldaýdyń bir bóligi.
2023 jyly óńir polıtseılerine 136 avtokólik berilgen bolatyn. Al bıyl bul qoldaý kólemi edáýir artty — avtopark is júzinde tolyq jańartylyp, polıtsııa bólimsheleri zamanaýı ári senimdi tehnıkamen qamtamasyz etildi.
— Bul sheshim — memleket pen oblys turǵyndarynyń polıtsııa qyzmetkerlerine degen joǵary seniminiń kórinisi. Іshki ister organdarynyń mamandary táýlik boıy qoǵamdyq tártipti kúzetip, shaqyrtýlarǵa jedel áreket etedi, túrli jaǵdaılarǵa tap bolǵan azamattarǵa kómek kórsetedi. Tártip saqshylarynyń kásibıligi men adaldyǵynyń arqasynda óńirde turaqty ári qaýipsiz orta qalyptasyp otyr, — dedi aımaq basshysy Nurymbet Saqtaǵanov.
Berilgen avtokólikter qyzmet atqarýǵa qajetti barlyq qural-jabdyqpen qamtylǵan. Bul ásirese shalǵaıdaǵy aýyldyq okrýgterde jumys isteıtin polıtseılerdiń jedeldigi men tıimdiligin arttyrýǵa múmkindik beredi. Tehnıkalyq múmkindikterdiń artýy patrýldik bólimshelerdiń, jedel-tergeý toptarynyń jáne basqa da qyzmetterdiń jumysyn jaqsartýǵa jaǵdaı týǵyzady.
Polıtsııa avtoparkin jańartý qoǵamdyq qaýipsizdikti arttyrý jáne quqyq qorǵaý organdarynyń ınfraqurylymyn damytýǵa baǵyttalǵan óńirlik baǵdarlamalar aıasynda aldaǵy ýaqytta da jalǵasyn tappaq.
Budan buryn TJM avıatsııalyq parki kez kelgen aýmaqqa qona alatyn ushaqpen tolyqqanyn jazǵan edik.