ShQO polıtseılerine koronavırýsqa qarsy vaktsına egile bastady
ÓSKEMEN. QazAqparat – Shyǵys Qazaqstan oblysynyń polıtsııa qyzmetkerlerine koronavırýsqa qarsy vaktsına egile bastady, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, tártip saqshylary arasynda COVID-19-ǵa qarsy erikti vaktsınatsııa bastaldy. Óz erkimen ekpe alýǵa daıyn polıtseılerdiń tizimi jasalǵan. Vaktsınany alǵashqylardyń biri bolyp departament bastyǵy Saǵat Mádıev aldy.
«Qazirgi ýaqytta ekpe egý salaýatty ómir saltynyń mańyzdy elementine aınalǵan. Vaktsınatsııaǵa jasaǵan qadamymyz koronavırýs ınfektsııasynyń taralýyn azaıtýǵa múmkindik beretini sózsiz», - dep atap ótti S.Mádıev.
Vaktsına alatyndar tiziminde 100-den astam adam bar. Olar aldyńǵy qatarda turatyn jáne halyqpen jıi qarym-qatynasta bolatyn patrýldik polıtsııa qyzmetkerleri men ýchaskelik polıtsııa ınspektorlary.
Aıta keteıik, polıtsııa qyzmetkerlerine osy apta ishinde vaktsına egilmek.
