ShQO polıtseıleri júrgizýshilerdiń kýálikterin planshet arqyly tekseredi
ÓSKEMEN. QazAqparat – Shyǵys Qazaqstan oblysynyń polıtsııa qyzmetkerleri júrgizýshilerdiń kýálikterin planshet arqyly tekseredi, dep habarlaıdy QazAqparat tilshisi.
ShQO Polıtsııa departamentiniń bastyǵy Saǵat Mádıev jumys saparymen Glýbokoe jáne Ulan aýdandaryna baryp, polıtsııa bólimderiniń jeke quramymen kezdesti. Óz sózinde ol jol qaýipsizdigin qamtamasyz etý úshin ereje buzý áreketterin tirkeý júıeleriniń jelisin keńeıtý jáne ıntellektýaldy kameralardy engizý, sondaı-aq joldardyń apattyq qaýipti ýchaskelerin tekserý jumystaryn jandandyrý boıynsha sharalar qabyldaý qajettigin aıtty.
Osy jyldyń 13 aqpanynan bastap kólik tizgindegen azamattar júrgizýshi kýáligi men avtokóliktiń tehnıkalyq tólqujatyn ózimen alyp júrýge mindetti emes. Alaıda onyń ózimen birge jeke basyn kýálandyratyn qujaty bolýy tıis. Kólik quralyn toqtatqan kezde júrgizýshi kýáligi men kólik quralyn tirkeý týraly kýáliktiń berilgenin patrýldik polıtsııanyń plansheti arqyly ІІO tıisti derekter bazasynan tekseriledi. Qazirgi ýaqytta osyndaı tásilmen saqtandyrý polısiniń bar-joǵy men tehnıkalyq baıqaýdan ótkendigi de tekserilýde», - dedi Saǵat Mádıev.
Departament bastyǵy Glýbokoe jáne Ulan aýdandaryndaǵy jumys sapary barysynda azamattardy jeke máseleleri boıynsha qabyldady. Qabyldaý kezinde kóterilgen barlyq bastamalar men kókeıtesti máseleler onyń jeke baqylaýyna alyndy.
