ShQO polıtseıleri joǵalǵan 19 jylqyny ıesine qaıtardy
ÓSKEMEN. QazAqparat – Shyǵys Qazaqstan oblysynda polıtsııa qyzmetkerleri joǵalǵan 19 bas jylqyny ıesine qaıtardy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, tártip saqshylary óńir aýmaǵynda «Mal urlyǵy» jedel aldyn alý sharasyn júrgizdi. Sonyń nátıjesinde qaraýsyz jaıylyp júrgen 750-den astam mal aıyp turaǵyna qamalǵan.
«Úsh kún ishinde 8 mal urlyǵy tirkeldi. Sonymen qatar osyǵan deıin jasalǵan 21 mal urlyǵy ashyldy. Urlyqqa barǵan 19 adam ustalyp, 2 uıymdasqan qylmystyq toptyń joly kesildi. 179 mal tabylyp, ıelerine qaıtaryldy», - delingen habarlamada.
18 aqpanda túski ýaqytta Ulan aýdandyq polıtsııa bólimine 69 jastaǵy azamat habarlasyp, 8 aqpan kúni Alǵabas aýylynan 10 shaqyrym jerdegi Bozanbaı aýyldyq okrýgine qarasty «Baısha» ýchaskesindegi jaıylymnan 19 bas jylqysynyń joǵalǵanyn aıtqan. Keltirilgen shyǵyn mólsheri – 3 mln teńge.
«Atalǵan fakti boıynsha QR QK-niń 188-baby 2-bóligimen sotqa deıingi tergeý júrgizildi. Ulan aýdany PB qyzmetkerleri jedel tergeý tobyn quryp, izdestirý jumystaryna tikushaq, eriktiler men qoryqshylar jumyldyryldy. Osylaısha joǵalǵan jylqylar «Qyzyl qaıyń» ýchaskesinen tabylyp, ıesine qaıtaryldy», - delingen vedomstvo málimetinde.
Budan bólek, 19 aqpanda keshki ýaqytta Zaısan aýdandyq polıtsııa bólimine 40 jastaǵy turǵyn qońyraý shalyp, jaıylyp júrgen 103 bas qoıynyń joǵalǵanyn habarlaǵan. Materıaldyq shyǵyn mólsheri 3 jarym mln teńgeni qurady.
Kóp uzamaı polıtseıler joǵalǵan 53 bas maldy kórshi aýyldyń mańynan tapty. Er adam malyn uzaq ýaqyt qaraýsyz qaldyrǵanyn moıyndap otyr. Qazirgi ýaqytta saqshylar qalǵan maldy izdestirýdi jalǵastyrýda.
