ShQO polıtseıleri zeınetkerdiń ólimine qatysty kúdiktini ustady
ÓSKEMEN. QazAqparat – Shyǵys Qazaqstan oblysynyń polıtsııa qyzmetkerleri 71 jastaǵy zeınetkerdiń ólimine qatysty kúdiktini ustady, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, jedel áreket etken tártip saqshylary asa aýyr qylmysqa qatysty kúdiktini anyqtady.
«Rıdder qalasy polıtsııa bóliminiń «102» arnasyna Poperechnoe aýylynyń turǵyny habarlasyp, kórshisiniń esh qımyl-qozǵalyssyz jatqanyn aıtqan. Oqıǵa ornyna birden jedel-tergeý toby jiberildi. Tekserý barysynda marqumnyń zorlyqpen óltirilgeni belgili boldy», - dep habarlady vedomstvo ókilderi.
Er adamnyń máıiti as úıdiń edeninen tabylǵan. Atalǵan fakti boıynsha QR Qylmystyq kodeksiniń 99-baby 1-bóligimen sotqa deıingi tergeý amaldary bastaldy.
«Jedel-izdestirý sharalarynyń nátıjesinde 46 jastaǵy kúdikti anyqtalyp, eki saǵat ishinde ustaldy. Ol óz kinásin moıyndap otyr. Qylmys jasaýyna aradaǵy janjal túrtki bolǵan», - dedi ShQO PD bastyǵy Saǵat Mádıev.
