ShQO polıtseıleri zańsyz aýlanǵan jarty tonnadan astam balyqty tárkiledi
ÓSKEMEN. QazAqparat – Shyǵys Qazaqstan oblysynyń polıtsııa qyzmetkerleri tıisti qujatsyz balyq tasymaldaǵan Pavlodar qalasynyń turǵynyn ustady, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, 14 qańtarda saǵat 01.10 shamasynda tártip saqshylary «Óskemen-Samar» tasjolynyń 60-shaqyrymynda «GAZ» avtokóligin toqtatqan.
«Tekserý kezinde 30 jastaǵy júrgizýshiniń Samar aýylynan Óskemenge qaraı kele jatqany belgili boldy. Kólikte ol 565 keli balyqty qujatsyz tasymaldaǵan. Qazirgi ýaqytta tekserý jumystary júrgizilýde. Sonyń nátıjeleri boıynsha shara qabyldanady», - dedi ShQO PD bastyǵy Saǵat Mádıev.
Sonymen qatar respýblıkalyq mańyzy bar «Óskemen-Almaty» tasjolyn patrýldeý kezinde polıtseıler «Fiat Ducato» kóligin toqtatqan. Kóliktiń júk salǵyshynan 40 qapqa salynǵan eshqandaı qujaty joq balyq tabyldy. Almaty qalasynyń 36 jastaǵy turǵyny balyqty Óskemennen tasymaldap bara jatqanyn jetkizgen. Oǵan qatysty QR ÁQBtK-niń 389-baby boıynsha ákimshilik hattama toltyryldy.
