ShQO polıtseıleri úsh kúnde 17 mln teńgeden astam aıyppul óndirdi
ÓSKEMEN. QazAqparat – Shyǵys Qazaqstan oblysynda polıtsııa qyzmetkerleri úsh kúnde 17 mln teńgeden astam aıyppul óndirdi, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, óńir aýmaǵynda «Boryshker» jedel aldyn alý sharasy júrgizildi. 3 kún ishinde tártip saqshylary, prokýratýra ókilderi jáne jeke sot oryndaýshylary ákimshilik aıyppuldaryn tólemeı júrgenderdi anyqtady.
«Sonyń nátıjesinde, bıýdjetke 17 mıllıon teńgeden astam qarajat óndirildi. Aıyppuldy ýaqtyly tólemegeni úshin 199 adamnyń kóligi mamandandyrylǵan turaqqa qoıyldy», - deıdi oblystyq PD bastyǵynyń birinshi orynbasary Eldos Zakımov.
Máselen, polıtseıler jol qozǵalysy erejelerin 11 ret óreskel buzǵan adamdy anyqtady. Onyń kóligi qaryzdy tolyq ótegenge deıin arnaıy turaqqa jetkizilgen.
Sonymen qatar shara barysynda 1000-nan astam azamatqa ákimshilik aıyppuldar boıynsha bereshegi bar ekendigi habarlandy.
