ShQO polıtseıleri urlanǵan bir úıir jylqyny ıesine qaıtardy
ÓSKEMEN. QazAqparat – Shyǵys Qazaqstan oblysynda polıtsııa qyzmetkerleri urlanǵan bir úıir jylqyny ıesine qaıtardy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, Jarma aýdandyq polıtsııa bólimine kelgen Belterek aýylyndaǵy sharýa qojalyǵynyń 27 jastaǵy basshysy qańtar aıynyń ortasynda bir úıir jylqysynyń joǵalyp ketkendigi týraly aryz jazǵan. Anyqtalǵandaı, erkin jaıylymnan 24 bas mal urlanǵan.
«Tártip saqshylary jedel-izdestirý sharalaryn júrgizdi. Nátıjesinde 15 kúnniń ishinde bir úıir jylqy ıesine qaıtaryldy. Mal ıesi óz kezeginde polıtsııa qyzmetkerlerine alǵysyn bildirdi», - dedi ShQO PD bastyǵy Saǵat Mádıev.
Osy rette, departament ókilderi mal urlyǵynyń negizgi sebebi maldaryn jaıylymǵa qaraýsyz jiberetin ıeleriniń salǵyrttyǵy ekendigin atap ótti. Iesiz jaıylyp júrgen tórt túlik barymtashylar úshin ońaı olja. Sonymen qatar qaraýsyz mal jol-kólik oqıǵalaryna da sebepshi bolyp jatady.
