ShQO polıtseıleri sharýagerdiń joǵalǵan 20-ǵa jýyq jylqysyn taýyp berdi
ShQO Polıtsııa departamenti baspasóz qyzmetiniń málimetine súıensek, Bozanbaı aýylynyń 33 jastaǵy turǵyny tártip saqshylaryna jaıylymnan 18 bas jylqysynyń joǵalǵany týraly habarlaǵan. Óz sózinde ol bir apta boıy maldy óz betimen izdegenimen odan esh nátıje shyqpaǵanyn jetkizdi.
«Polıtseıler atalǵan fakti boıynsha QR QK-niń 188-baby 4-bóligine (mal urlyǵy) sáıkes sotqa deıingi tergeý amaldaryn qolǵa aldy. Jábirlenýshimen birlesip, izdestirý sharalaryna kiristi. 10 kúnniń ishinde tasjoldar, et ónimderin ótkizý oryndary men kólikter tekserildi. Sonyń nátıjesinde, jylqylar Januzaq aýyly mańynda tabylyp, ıesine qaıtaryldy», - delingen aqparatta.
Osy rette, polıtsııa qyzmetkerleri óńir jurtshylyǵyna mal urlyǵynyń nemese joǵalýynyń aldyn alý úshin tórt túlikti qaraýsyz qaldyrmaýǵa shaqyrady.
