ShQO polıtseıleri eki kúnde 16 mln teńgege jýyq aıyppul óndirdi
ÓSKEMEN. QazAqparat – Shyǵys Qazaqstan oblysynda polıtsııa qyzmetkerleri «Boryshker» jedel aldyn alý sharasy barysynda 16 mıllıon teńgege jýyq aıyppul óndirdi, dep habarlaıdy QazAqparat tilshisi.
ShQO polıtsııa departamenti baspasóz qyzmetiniń málimetine súıensek, 8-10 qyrkúıek aralyǵynda óńirde ákimshilik quqyqbuzýshylyq jasaǵandardan aıyppul óndirýge baǵyttalǵan «Boryshker» jedel aldyn alý sharasy ótkizildi.
Shara barysynda arnaıy mobıldi toptar qurylǵan. Tártip saqshylary 350-ge jýyq reıd júrgizip, boryshkerlerden jalpy somasy 16 mıllıon teńgege jýyq 1590 ákimshilik aıyppul óndirdi.
Sonymen qatar polıtsııa qyzmetkerleriniń zańdy talaptaryn oryndamaǵan 5 júrgizýshiniń kólikteri aıyppul turaǵyna qoıyldy.
Mysaly, NISSAN kóligin tizgindegen 30 jastaǵy Óskemen qalasynyń turǵyny birneshe aı boıy 75 myń teńgeden astam aıyppuldy tóleýden jaltaryp júrgen. Onyń kóligi aıyppul turaǵyna jetkizildi.
«Budan bólek, polıtseıler uzaq ýaqyt aıyppul tólemegen kólik ıelerin toqtatyp, túsindirý jumystaryn júrgizdi. Nátıjesinde 725 320 teńge kólemindegi 37 aıyppul sol jerde óndirildi» delingen vedomstvo málimetinde.
