ShQO polıtseıleri bir jylda 256 keli esirtki tárkilegen

ÓSKEMEN. QazAqparat –Shyǵys Qazaqstan oblysynyń polıtsııa qyzmetkerleri ótken jyly 256 keli esirtki tárkilegen, dep habarlaıdy QazAqparat tilshisi.

ShQO Polıtsııa departamentiniń bastyǵy Saǵat Mádıev quqyq qorǵaý organdarynyń jumysyndaǵy mańyzdy baǵyttardyń biri nashaqorlyqpen kúres ekendigin atap ótti.

«2020 jyly 253 esirtki qylmysy anyqtalǵan. Onyń ishinde 157 fakti esirtki saýdasyna qatysty boldy. Zańsyz aınalymnan jalpy kólemi 256 keli ártúrli esirtki alynǵan»,- dedi ol.

ShQO bas polıtseıi tártip saqshylary elimizdiń ońtústik óńirlerinen alty esirtki jetkizý arnasyn jaýyp, bes qylmystyq toptyń jolyn keskenin atap ótti.

«Sonymen qatar esirtkini nasıhattaý men jarnamalaýǵa qarsy kúres belsendi júrgizilýde. Esirtki saıttaryn jarnalamaıtyn 112 «graffıtı» sýret anyqtalyp, joıyldy. Budan bólek, esirtkini nasıhattaıtyn 73 ınternet-akkaýnt buǵattaldy», - dedi Saǵat Mádıev.