ShQO polıtseıleri balasyna araq bergen áıelge qatysty tekserý júrgizdi
ÓSKEMEN. QazAqparat – Sońǵy kúnderi áleýmettik jelide qyzyna araq ishkizip jatqan áıeldiń vıdeosy tarap ketken edi.
Anyqtalǵandaı, oqıǵa Shyǵys Qazaqstan oblysynda bolǵan. Osyǵan oraı tártip saqshylary áıel adamdy taýyp, tekserý jumystaryn júrgizdi, dep habarlaıdy QazAqparat tilshisi.
Áleýmettik jelilerde taraǵan anasy balasyna araq bergen vıdeo qoǵamda qyzý talqyǵa tústi. ShQO Polıtsııa departamenti atalǵan beınematerıaldy zerttep, áıel adamnyń Ulan aýdanynda turatynyn anyqtaǵan.
«Bul vıdeo jýyqta emes, osydan biraz ýaqyt buryn túsirilgen bolyp shyqty. Osyǵan oraı Ulan aýdanynyń ıývenaldy polıtsııa qyzmetkerleri áıeldiń turǵylyqty jeri men turmystyq jaǵdaıyn tekserdi. Buǵan deıin de osyndaı tekserýler júrgizilgen bolatyn», - deıdi ShQO Polıtsııa departamenti baspasóz qyzmetiniń basshysy Áıgerim Nurǵazına.
Qazirgi ýaqytta áıel adamnyń alkogoldi ishimdikterge táýeldiligi joq. Atalǵan otbasy aýdandyq polıtsııa bóliminiń ýchaskelik polıtsııa ınspektorynyń baqylaýynda.
