ShQO polıtseıleri adasyp ketken 87 jastaǵy keıýanaǵa kómektesti
ÓSKEMEN. QazAqparat – Shyǵys Qazaqstan oblysy Altaı aýdanynyń polıtseıleri adasyp ketken keıýanaǵa úıge jetýge kómektesti, dep habarlaıdy QazAqparat tilshisi.
ShQO polıtsııa departamenti baspasóz qyzmetiniń málimetine súıensek, «102» jedel arnasyna habarlasqan azamat Altaı qalasyndaǵy dárihanalardyń birinde ájeniń adasyp júrgenin jetkizdi.
Qart kisini áńgimege tartqan farmatsevtiń aıtýynsha, ol óziniń aty-jónin, turatyn úıiniń mekenjaıyn esine túsire almaǵan.
«Oqıǵa ornyna ýchaskelik polıtsııa ınspektory Madııar Ómirzaqov kelip jetti. Saqshy zeınetkerdiń kim ekenin jáne turǵylyqty mekenjaıyn anyqtady. Kóp uzamaı áje jaqyndaryna aman-esen jetkizildi», - delingen aqparatta.
Belgili bolǵandaı, úıde eshkim bolmaǵan kezde 87 jastaǵy keıýana dárihanaǵa shyqqan. Sol jerge jetkenimen, qaıtar joldy umytyp qaldy.
Sebebi qart kisiniń este saqtaý qabileti nasharlap ketken.
Óz kezeginde ájeniń týǵan-týystary polıtsııa qyzmetkerlerine alǵysyn jetkizdi.
