ShQO polıtseıleri 80-ge jýyq boryshkerdiń kóligin aıyp turaǵyna jetkizdi
ÓSKEMEN. QazAqparat – Shyǵys Qazaqstan oblysynyń polıtsııa qyzmetkerleri jol erejesin buzyp aıyppuldy tólemeı júrgenderden bir kún ishinde 6 mln teńge óndirdi, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, tártip saqshylary óńir aýmaǵynda 18 tamyzdan bastap «Boryshker» jedel aldyn alý sharasyn júrgizýde. Mundaǵy maqsat – jol erejesin buzǵan kólik júrgizýshilerinen ákimshilik aıyppul óndirý.
Bir kún ishinde polıtsııa qyzmetkerleri boryshkerlerden 6 mln teńgeden astam aqsha óndirdi. Sondaı-aq 77 avtokólik mamandandyrylǵan turaqqa qoıylǵan.
«Máselen, jalpy somasy 200 myń teńgeden asatyn 20-dan astam aıyppuly bar Óskemen qalasynyń turǵyny anyqtaldy. Júrgizýshi únemi ereje buzyp, aıyppuldy tólemeı júrgen. Qazirgi ýaqytta onyń avtokóligi aıyp turaǵyna jetkizildi», - dedi ShQO PD Ákimshilik polıtsııa basqarmasynyń bastyǵy Ernar Bazarov.
Aıta keteıik, «Boryshker» jedel aldyn alý sharasy 20 tamyzǵa deıin jalǵasady.
