ShQO polıtseıleri 5 tonnadan astam zańsyz aýlanǵan balyqty tárkiledi
ÓSKEMEN. QazAqparat- Shyǵys Qazaqstan oblysynda polıtsııa qyzmetkerleri 5 tonnadan astam zańsyz aýlanǵan balyqty tárkiledi, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, polıtseılerge Zaısan kóliniń jaǵasynda Tassaı aýylynyń turǵyndary zańsyz balyq aýlaýmen aınalysatyndyǵy týraly habar kelip tústi.
Tártip saqshylary «Qaraqas» ýchaskesinde 34 jastaǵy er adamdy ustady. Tekserý barysynda onyń «VAZ» avtokóliginen balyq aýlaıtyn quraldar jáne 150 keliden astam zańsyz aýlanǵan shortan, kókserke, taban balyqtary tárkilendi. Atalǵan fakti boıynsha QR QK-niń 335-baby 1-bóligine (balyq resýrstaryn, basqa sý janýarlaryn nemese ósimdikterin zańsyz óndirý) sáıkes tergeý bastaldy.
«Jyl basynan beri polıtsııa qyzmetkerleri memlekettik organdarmen birlesip tabıǵatty qorǵaý zańnamasyn buzýdyń 237 faktisin anyqtady. Sonyń nátıjesinde, 5 tonnadan astam balyq tárkilengen»,– dedi ShQO PD bastyǵy Saǵat Mádıev.
Búgingi tańda zańsyz balyq aýlaýdyń 7 faktisi boıynsha qylmystyq is qozǵaldy. 230-dan astam balyqshy ákimshilik jaýapkershilikke tartylǵan. Memleketke keltirilgen jalpy shyǵyn mólsheri 14 mln teńgeden asyp otyr.
