ShQO polıtseıleri 13 atys qarýyn tárkiledi
ÓSKEMEN. QazAqparat – Shyǵys Qazaqstan oblysynyń tártip saqshylary 13 atys qarýyn tárkiledi, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, 9-11 qarasha aralyǵynda zańsyz aınalymdaǵy qarý-jaraqty anyqtaý maqsatynda «Qarý» jedel aldyn alý sharasy ótkizilgen.
«Úsh kún ishinde jedel-izdestirý sharalary barysynda 13 atys qarýy tárkilendi. Atap aıtqanda, 3 ıir oıyqty, 6 tegis uńǵyly jáne 4 sholaq myltyq, sondaı-aq 15 oq-dári men 3 sýyq qarý», - deıdi ShQO PD bastyǵynyń orynbasary Talǵat Shaıahmetov.
Máselen, polıtsııa qyzmetkerleri Shemonaıha qalasyndaǵy 39 jastaǵy er adamnyń úıinen tirkeýge alynbaǵan bir uńǵyly, 28 kalıbrli ańshy myltyǵyn tapty. Sarapshy qorytyndysyna sáıkes tárkilengen qarý zaýyttyq ádispen jasalǵan jáne oq atýǵa jaramdy. Turǵynǵa qatysty QR Ákimshilik quqyq buzýshylyq týraly kodeksiniń 482-baby, 1-bóligimen ákimshilik hattama toltyrylǵan.
Osy rette, departament ókilderi óńir halqyna qarýdy ýaqytynda tirkeýge qoıýǵa, qarý saqtalatyn úı-jaılardyń qaýipsizdik júıesin retke keltirýge shaqyrady.
