ShQO: polıtseı 8 naýryz merekesi qarsańynda súıiktisine usynys jasady
ShQO Polıtsııa departamentinde 8 naýryz Halyqaralyq áıelder merekesi qarsańynda erekshe oqıǵa boldy. Óskemen qalalyq PB patrýldik polıtsııa batalonynyń qyzmet ınspektory, polıtsııa aǵa leıtenanty Tursynǵalı Jasulan óziniń áriptesi, kámeletke tolmaǵandardyń isteri jónindegi ýchaskelik polıtsııa ınspektory Mahabbat Maratovaǵa shańyraq kóterýge usynys jasady.
«Merekelik beınerolık túsirý barysynda tosynsyı ázirlegen Jasulan óziniń súıiktisine gúl shoǵyn syıǵa tartyp, oǵan úılenýge usynys jasaǵan. Árıne, bul áserli sát beınejazbaǵa túsip qaldy», - dep habarlady departamenttiń baspasóz qyzmeti.
Ǵashyq jandar ótken jyldyń kúzinde tanysypty. Olar bir ýaqytta kadrlar bólimine kezekti eńbek demalysyn rásimdeý úshin kelgen. Sózden sóz shyǵyp áńgimeleri jarasqan eki polıtseıdiń tanystyǵy osylaı bastalyp, sodan keıin dostyq shynaıy mahabbatqa ulasqan.
«Áriptester Jasulan men Mahabbat ózderin qyzmet tabystyrǵanyn aıtady. Ekeýi de ishki ister organdarynda adal qyzmet etip keledi», - delingen málimette.
Aıta keteıik, búgingi tańda ShQO Polıtsııa departamentinde 50-den astam erli-zaıypty qyzmet etedi.
