ShQO ózenderinde sý deńgeıi kóterilýi múmkin
ASTANA. KAZINFORM – Shyǵys Qazaqstan oblysynda qar qory men ondaǵy sý mólsheri normadan 1,5-2 ese joǵary. Bul týraly oblystyq TJD TJ aldyn alý basqarmasynyń aǵa ınjeneri Aıaýlym Kekıeva aıtyp berdi.
«Qazirgi ýaqytta óńirdiń taýly aýmaqtaryndaǵy qar jamylǵysynyń jáne ylǵal qorynyń bıiktigin, aýa temperatýrasynyń joǵarlaýy, onyń ishinde túngi ýaqytta jáne jaýyn-shashynnyń bolýy múmkindigin eskere otyryp, sáýir aıynyń ortasynan bastap taýly ózenderde (Buqtyrma, Úlbi, Ýba, Turǵysyn, Kúrshim, Qaljyr jáne Hamır) sý deńgeıiniń kóterilýi kútilýde», - dedi spıker Respýblıkalyq aqparattyq shtabta ótken brıfıngide.
Búginde qar jamylǵysynyń aýdany 48 % qurap otyr. Kóptegen aýdandarda qar qory jáne ondaǵy sýdyń mólsheri normadan 1,5-2 ese joǵary. Bul jaǵdaı sý tasqyny qaýpin joqqa shyǵarmaıdy, alaıda qazir oblys aýmaǵynda qater joq.
«Sý tasqyny jaǵdaıyn baqylaý úshin turaqty túrde aerovızýaldyq tekserýler júrgizilip jatyr. Barlyq 132 gıdrotehnıkalyq qurylys shtattyq rejımde jumys isteýde. Bógetterde aldyn ala sýdyń deńgeıin tómendetý jumystary júrgizildi. Sý tasqyny bolýy múmkin ýchaskelerge táýliktik kezekshilik qoıylǵan. Oblystyq jedel shtab táýlik boıy jumys isteýde. Barlyq kúshter men quraldar ázirlikke keltirildi. Jaǵdaı qalypty jáne baqylaýǵa alynǵan», - dedi Aıaýlym Kekıeva.
