ShQO ózenderinde sý deńgeıi qaýipti mejeden asqan joq
ÓSKEMEN. KAZINFORM — Shyǵys Qazaqstan oblysyndaǵy ózenderde sý deńgeıi qaýipti mejeden asqan joq.
ShQO tótenshe jaǵdaılar departamenti baspasóz qyzmetiniń málimetine súıensek, óńirdegi sý tasqyny qaýpi bar ýchaskelerge turaqty monıtorıng júrgizilýde.
«TJM tótenshe jaǵdaılardy joıý departamentiniń bastyǵy Qaharman Orazalın Shyǵys Qazaqstanǵa jasaǵan jumys sapary barysynda Rıdder qalasyna, Zaısan jáne Shemonaıha aýdandaryna bardy. Munda ol ózender men bulaqtardyń boıyndaǵy úıilgen bógetterdi qarap shyǵyp, jaǵdaı shıelenisken jaǵdaıda kúshter men quraldardyń daıyndyǵyn tekserdi. Sondaı-aq jergilikti atqarýshy organdar júrgizetin aldyn alý is-sharalarynyń barysymen tanysty», — delingen aqparatta.
Qazirgi ýaqytta oblysta sý tasqynynyń ekinshi kezeńi júrýde.
Osyǵan baılanysty ózenderdegi sýdyń deńgeıine kún saıyn monıtorıng júrgizilip jatyr.
Búginde sý deńgeıi qaýipti mejeden asqan joq.
Óńirdegi jaǵdaı qıyndap ketse jergilikti atqarýshy organdar men azamattyq qorǵaý qyzmetterinen 2270 adam, 732 tehnıka, 61 qaıyq jáne 234 motopompa saqadaı saı.
