ShQO ózenderinde muzdy usaqtaý jumystary júrgizilip jatyr

ÓSKEMEN. KAZINFORM – Shyǵys Qazaqstan oblysyndaǵy ózenderde muzdy usaqtaý jumystary júrgizilip jatyr.

ShQO Tótenshe jaǵdaılar departamenti baspasóz qyzmetiniń málimetine súıensek, qutqarýshylar men jergilikti atqarýshy organ ókilderi kún saıyn ózenderdegi jaǵdaıǵa monıtorıng júrgizedi. Búgin Shemonaıha qalasyndaǵy avtokólik kópiri mańynda muzdy usaqtatý úshin jarylys jasaldy.

«Dál osy ýcheskeniń tańdalý sebebi - Úbe ózeninde qatqan muz kópir tirekterine jabysyp, ózendi bitep, jaǵalaýdy sý basýyna ákelýi múmkin. Jarylys jumystaryn júrgizbes buryn mamandar sol jerge baryp, muzdyń qalyńdyǵyn ólshedi», - delingen aqparatta.

Mundaǵy muz qalyńdyǵy shamamen 1 metr bolǵan. Turǵyndarǵa jarylys týraly aldyn ala eskertildi. Kópirdegi qozǵalys jáne oǵan kiretin barlyq jol jabyldy. Muzdy usaqtaý nátıjesinde 10000 sharshy metrden astam aýmaq qamtyldy.

Aıta keteıik, keshe Altaı aýdanyndaǵy Buqtyrma ózeninde de muz usaqtalǵan.